GIPANGLAMPORNAS sa host Houston Rockets ang kuwangan og haligi nga back-to-back champions Golden State Warriors, 107-86, kagahapon sa National Basketball Association (NBA).
Lima ka mga magduduwa sa Rockets ang ningmugna og dobleng numero nga puntos pinangulon sa 27 ni MVP James Harden aron makmakon ang puwersa nga nagpalagpot kanila sa Western Conference finals sa miaging season.
Human sa mangil-ad nilang pagsugod sa season, ang Rockets nakaposte sa ikatulo nilang sunodsunod nga kadaugan aron inaton ang ilang rekord ngadto sa 7-7.
Ang Warriors, nga padayong ningkombati nga wala ang ilang sinaligang pointguard nga si Stephen Curry nakatilaw sa ikaduha nilang pilde sa miagi nilang tulo ka mga duwa nga nagpahagsa sa ilang rekord ngadto sa 10-4. Si Curry nagpaalim pa sa angol sa iyang tiil.
Naglabaw na og 13 puntos ang Rockets pagkahuman sa 3rd quarter unya pagsugod sa 4th quarter, nakamugna pa sila og 12-2 run aron paburoton ang ilang bintaha ngadto sa 23 puntos, 88-65.
Ning maong pagsutoy sa opensa sa Rockets, ang Warriors nakamugna og ubay-ubay nga turnovers.
Gikan sa timeout, ang Rockets padayong nagbangis ug ningmugna na sab kini’g 9-0 run aron hingpit nga dabudabohan ang Warriors, 97-65, sa tungatungang bahin sa 4th quarter.
Gipangulohan ni Kevin Durant ang nagkagidlay nga Warriors pinaagi sa iyang 20 puntos. Bugtong si Durant lang ang arang-arang nga nakaduwa sa habig sa Warriors hinungdan nga nakatilaw sila og grabeng kastigo.
Si Draymond Green, kinsa mibalik na gikan sa usa ka duwa nga suspensyon, wala’y nahimong puntos.
Gisuspenso si Green tungod sa salawayong nahimo niini dihang nagkalalis sila ni Durant dili pa lang dugay.
Gipasabot ni Green nga nagkaestorya na sila ni Durant ug ilaha nang ilubong sa kalimot ang nahitabo tali kanila ug maglantaw na sila sa umaabot.
“I think there’s no secret that I am an emotional player,” pasabot ni Green. “I wear my emotions on my sleeve. I play with that same emotion. Sometimes they get the best of me. And (if) it doesn’t work to my favor I’m going to live with that.”
Ang Rockets, nga mianunsyo nga ilaha nang gitangtang si Carmelo Anthony sa ilang line-up, igo rang naglabaw og unom ka mga puntos sa halftime.
Sa 3rd quarter, hinayhinay nang gibiyaan sa Rockets ang Warriors hangtod nga hingpit nilang nadominar ang panagsangka. AP, ESL