NAHINGPIT ang upat ka adlaw nga summit niadtong Dominggo, Pebrero 24, didto sa Vatican diin gitambongan sa mga pangulo sa simbahang Romano Katoliko gikan sa nagkadaiyang bahin sa kalibutan.
Ilang gihisgutan kining mga sexual abuses ug mga eskandalosong panghitabo sa simbahan nga gilambigitan sa mga pari ug mga obispo.
Sa iyang isog nga mensahi, si Pope Francis mideklarar og “all-out-battle” batok sa mga opisyales sa simbahan nga nangalambigit sa maong salawayon nga kalihukan.
Gipatawag ang panagtigum nunot niining nagkadako nga problema sa simbahan tungod sa paglugwa kanunay sa mga report batok sa pangabuso sa mga pari ngadto sa kabataan o hamtong.
Gani, nanggawas na kining reports bahin sa mga pari ug obispo nga gipang-aresto gumikan sa ilang pag-abuso sa kabataan. Dunay gipangtaktak na usab sa ilang serbisyo.
Sama sa ubang kahugpongan, relihiyoso man o dili, naa kining kaso sa sexual abuse ug sagad sa mga biktima kadtong mga ordinaryo nga miyembro, ug sagad sa naghimo sa salaod mao kadtong taas ug katungdanan.
Apan, lahi sa simbahan, tungod kay kining mga pari o obispo maoy gitan-aw ug gisunod sa mga parokyano isip ehemplo sa maayong binuhatan. Taas og respeto ang mga parokyano ngadto sa ilang pari tungod kay giila kini nila nga maoy gabay kanunay sa ilang maayong pagkinabuhing Kristohanon.
Maayo ang gihimo ni Pope Francis pagpatawag og summit, apan makapaabot ba kaha kita og konkretong aksiyon aron, bisan kaminusan nalang unta kining pagpangabuso sa mga kaparian?
Ang problema man gud ani mao nga kon ang ugat sa kaguliyang dili maputol magpadayon gihapon kining pangabuso. Nagpasabot, nga kon maghimo ta og lakang paglimpiyo sa palibot atong unahon paghipos ang mga sagbot mismo sa atong tugkaran.
Niadtong Marso 2018, usa ka male escort nga si Francesco Mangiacapra nipagawas og report bahin sa mga baho sulod mismo sa Vatican. Iyang gihulagway unsa kangil-ad ang gipanghimo sa mga pari.
Giladlad ni Mangiacapra ang mga ebedensiya diha sa social media ug dokumento kon unsa ang mga pamaagi sa mga pari pagkuha o pag-abang og mga male escort aron ilang gamiton ug pahimuslan nga lawasnon.
Kining expose ni Mangiacapra dili hinuon bag-o kay bisan sa miaging katuigan, mismo ang ‘buotan’ nga mga pari, nga migawas sa ilang katungdanan, mibulgar usab sa daghang mga pangabuso sulod mismo sa Vatican.
Gawas sa mga pari, dunay mga madre usab nga mitug-an sa ilang gipandangatan diha sa kamot sa mga pari.
Niining sitwasiyon karon, mas maayo tingali unahon paglimpiyo ni Pope Francis ang Vatican kay basin naa diha ang ‘dragon’ nga padayong namiktima og kabataan ug mga babaye.
Mosugot kaha ang Vatican nga ablihan nila ang ilang pasilidad alang sa lapad nga imbestigasyon? Hala, basin matultolan ang underground nga gihimong lubnganan sa mga bata nga gipang-abort gikan sa mga madre.