GIPANINGKAMOTAN karon sa kapulisan sa Cagayan de Oro Police Office (Cocpo) nga ilang matunol ang warrant of arrest batok sa founder sa Cryptocurrency Ploutos Coins.
Nigawas ang warrant of arrest niadtong Pebrero 12 batok kang Mark Steven Freeman human gipasakaan og kaso nga large scale swindling diin ubay-ubay ka mga biktima ang nakabubo sa ilang mga dagkong puhonan.
Gibutyag ni Police Superintendent Mardy Hortillosa, tigpamaba sa Cocpo, nga paningkamotan sa otoridad nga matunol ang maong warrant ilabi na nga ubay-ubay ang mga nabiktima niini dili lamang mga ordinaryong mga tawo lakip na ang mga dagkong opisyal ug trabahante sa gobiyerno.
“Maningkamot mi, amo na e-serve nga warrant sa iya para ma aresto siya ug ma turn-over namo siya sa korte,” matud ni Hortillosa.
Nasayran nga wala na karon sa iyang pinuy-anan sa siyudad si Freeman apan makigkoordinar ang kapolisan sa mga counterpart ug kung nakagawas na kini sa nasud mamahimo gihapon kini silang makigkoordinar sa international police.
“Wala pa namo siya madakpi sa iya last address pero dili mi maka confirm kung asa na siya but kung wala na siya sa city naa man ta counterpart sa uban nga unit outside Cagayan de Oro ug kung naa na siya gawas sa nasud naa man ta counterpart sa international police,” matud ni Hortillosa.
Samtang gibutyag usab ni Kagawad George Goking, tsirman sa Trade and commerce, nga ang matabang na lamang sa komitiba niini mao ang pag-endorso ngadto sa National Bureau of Investigation interpol nga ma serve ang warrant.
Nag-apelar usab kini ngadto kang Freeman nga atubangon ang iyang kaso.
“Akong appeal for Freeman to come and face the court kay no bail bond raba ni iyaha,” matud ni Goking.
Positibo usab kini alang sa mga biktima ug nag-invest niini ilabi na nga duna na kini warrant.
Nasayran nga ang maong warrant of arrest gi-isyu ni presiding judge Marites Filomena Rana-Bernales sa Regional Trial Court (RTC) 10 Branch 39.
Kahinumdoman nga namahimo kining kontrobersiyal human usab nga nagpagawas ang Securities and Exchange Commission og warning diin ang Ploutos Coins’ cryptocurrency scheme nga nag-aghat og mga investor duna'y anomaliya ug gikonsiderang ilegal tungod kay dili kini aprobado sa maong buhatan.
Gani gipatawag pa kini sa komitiba ni Goking ug nisaad pa kaniadto nga bayaran o ulian ang mga nakabubo na sa ilang mga minilyong mga puhonan.
Sa pagkakaron wala pa'y masutang nahimutangan ni Freeman. (KCS)