MIPASAKA na ang kapulisan og kasong homicide batok kang Nel Spencer Tiu, ang hinigugma ni Ashley Abad, kadtong 19 anyos nga dalaga, kinsa namatay human ma-overdose sa party drug nga ecstasy. Ang amahan mismo ni Ashley nga si Jose Alfonso Abad ang personal nga mipasaka sa kaso didto sa City Prosecutor’s Office niadtong Sabado, Pebrero 23, inubanan sa kapulisan. Gi-attach sa complaint ni Mr. Abad ang iyang affidavit diin nagbutyag nga si Tiu mao gyuy naggalgal o nag-pressure ni Ashley nga motumar sa party drug atol sa usa ka pre-Sinulog party sa Cebu Business Park niadtong Enero 19 sa gabii.
Base kini sa text messages nila ni Tiu ug Ashley nga nagsabot ang duha kabahin sa pagtomar og ecstasy. Gusto ni Ashley nga magtunga sila sa usa ka tabletas apan miinsister si Tiu nga tagsa sila. Matod pa ni Ginoong Abad nga si Tiu maoy nagpalit sa party drug gikan sa usa ka Brian sa kantidad nga P1,600. Sukwahi kini sa unang pamahayag ni Tiu nga dili siya maoy tinubdan sa party drug. Sa pamahayag ni Presidente Duterte nga si Ashley mismo maoy “source”sa party drug. Daghan pang mga text messages ni Tiu ug Ashley. So, dili diay si Ashley ang tinubdan sa ecstasy kay si Tiu man ang nagpalit gikan sa usa ka Brian.
Base aning maong mga text messages, maka-ingon kita nga dili diay inosente si Tiu sa kamatayon ni Ashley sukwahi sa pagpanghimakak nga siya maoy mi-supply og party drug sa iyang uyab. Dili ko abogado, pero ambot kon makabarug ba sa husgado kining mga ebidensiya nga gi-presentar sa banay’ng Abad ug sa kapulisan ngadto sa piskaliya? Ang affifavit sa amahan dili pa kini igo nga makapa-konbikto ni Tiu. Nagkinahanglan pa og dugang mga saksi.
Ang pamahayag ni PresidenteDuterte makatabang og dako sa habig ni Tiu kay Presidente na god na ang namahayag. Pero ambot og diin gikan usab ang Presidente sa maong inpormasyon. “Adding insult to injury” naman hinuon ni ngadto sa banay’ng Abad. Hinaot nga nunot motuyok ang ligid sa hustisya sa kamatayon ni Ashley. Sa samang higayon nga magsilbi unta kining leksiyon sa mga batan-on og sa matag pamilya. (bobbygnalzaro@gmail.com)