TALIWA sa pamahayag ni Presidente Duterte, porsigido gihapon ang pamilyang Abad nga kahatagan og igong hustisya ang kamatayon sa ilang anak nga si Ashley kinsa nahunosan sa iyang kinabuhi tungod sa pagka overdose sa party drugs nga natumar niini atol sa usa ka konsiyerto niadtong Enero 19, bisperas sa kasaulogan sa Sinulog 2019.
Niadtong Sabado sa buntag, gipasaka na ang kasong homecide batok sa boyfriend ni Ashley nga si Nel Spencer Tiu kinsa ilang gituohan nga maoy naghatag sa party drugs ngadto sa 19-anyos nga tinun-an.
Kini binsa pa man sa gianunsiyo sa Presidente nga si Ashley ra mismo ang naghupot sa drugs ug gani mao pa kini nag-text ngadto sa iyang laing amiga nga daw sa nangimbitar ug nangagni niini.
Gipadayag sa pamilyang Abad nga ang ilang pagpasaka og kaso maoy sinugdanan pa lang sa ilang pagpakigkombati alang sa hustisya sa ilang anak nga usa ka nursing student ug sa samang higayon magpukaw ug maghatag og leksiyon sa mga kabatan-onan kon unsa ang kadaot nga mahimo sa maong party drugs.
Pero ambot og unsay nasud sa utok niining hepe sa Central Visayas Police nga si Chief Superintendent Debold Sinas nga mora man og iya na hinuon nga gi-discourage ang pamilyang Abad.
Imbis mopasalig og koperasyon ug ayuda aron mapalig-on ang mga ebedensiya, unsa bang pagka-unsa, nga iya man hinuon gipadayag nga weak ang maong kaso tungod kay pulos lang circumstancial evidence ang nakuha ug ila lang gipasaka ang kaso aron lang paghupay sa pamilyang Abad.
Sa laktod nga pagkasulti giulo-ulohan ra diay ni Sinas ang mga Abad.
Sa pamahayag nga giluwatan sa hepe sa PRO 7 susama ra usab og iya nang giluwas ug gilimpiyo si Tiu sa maong kaso. Mora na hinuon siya og nangabugar sa gikasohan.