WA NA ko mahibong pagkabasa nakong nagbuwag na si Miss Universe 2018 Catriona Gray ug sa iyang uyab nga si Clint Bondad.
Di ba human nidaug si Janine Tugonon sa Miss Universe 2012 isip first runner-up nagbuwag man sad to sa iyang uyab tungod sa third party nga giingong bokalista sa The Script.
Si Maxine Medina nagbuwag sad sa iyang uyab human niya gipresentar ang Pilipinas sa Bb. Pilipinas-Universe 2017.
Mao sad si 2013 Miss Universe third runner-up Ariella Arida ug aktor nga si Ervic Vijandre ug 2015 Miss Universe Pia Wurtzbach ug sa iring-iring niyang doktor.
Mao bitaw wa gyud ko anang mga beauty queen kay ta-as kaayo na sila og mga ego! Di ma-reach! Haha!
RATED K
Nag-atang-atang ko sa “Rated K” ni Korina niadtong Dominggo kay mao ma’y ilang gipasiatab nga abangan ang iyang estorya sa Rated K pero puros ra man to litrato ug video sa mga bata ang ilang gipakita.
“Abangan sa susunod na mga Linggo” na pud kuno! Ah sige lang. Puwerte ra bang daghanang commercial.
Mas juicy pa tong mga impormasyon nato sa Superbalita Laysho nga nigawas dinhi pag-Sabado ug Dominggo.
NEWS ONLINE
Pareho atong estorya ni Kris Aquino nga gibasura ang iyang kaso sa korte.
Kon tan-awon to ninyo sa mga news online malipong ka og binasa sa kataas sa ilang mga artikulo.
Pero sa atong estorya sa Laysho dali ra kaayo sabton kay gawas nga mubo ug Binisaya, sangkap man gihapon sa mga nag-unang kasayuran.
Mao nang basa lagi mo’g Superbalita Laysho kay mas pang-masa ta dinhi ug mas reader-friendly bisa’g pa-bisdak bisdak lang ta bay!
LITO LAPID
Wa gihapon si Lito Lapid sa “Harapan 2019” senatorial debate sa ABS-CBN niadtong Dominggo sa gabii kay matod niya di kuno pangilngigay motubag og English ang pagpanerbisyo sa publiko.
Pero nag-tinagalog ra man ang mga senatorial candidates sa Harapan 2019. Bisan sa senatorial face-off sa GMA-7 nag-tinagalog ra gyud tanan.
Dapat moapil unta siya kay aron makadungog sad ang mga botante kon nganong angay siyang pilion ug kon unsa iyang hunahuna sa mga isyu nga giatubang karon sa atong nasud.
Dili man na sa pangilngigay mo-ininglish. Kusog lang ka tungod sa FPJ’s Probinsyano. Pero unsa may imong plata porma? Mao na diha! Pag-tsur uy!