KAGAHAPON atong gisaulog ang ika-33 nga anibersaryo sa “People’s Power Revolution” nga nahitabo sa Epifanio de los Santos Avenue (Edsa) didto sa kaulohan.
Mao kini ang katapusang baraha sa “anti-dictatorship coalition” aron mapukan ang rehimen ni Presidente Ferdinand E. Marcos.
Napalagpot ang magtiayon apil ang ilang mga anak ngadto sa Hawaii dala ang kahon-kahon nga salapi lulan ang helicopter sa America ug didto na siya namatay.
Nahimong presidente si Corazon Cojuanco Aquino nga biyuda ni kanhi Senador Benigno Aquino nga napatay pod sa airport sa iyang paghiabot gikan sa iyang pagpatambal sa America.
Kung wala ko masayop, apil na kini sa libro sa eskuwelahan aron mahibal-an sa mga milenyals ang tinuod nga nahitabo sa atong kasaysayan.
Abi man god sa kabatan-onan karon nga sayon ra ang Martial Law kaniadto kay mao kini ang ilang nakita sa martial law sa Mindanao ubos sa administrasyon ni Pangulong Rodrigo Duterte.
Ang martial law kaniadto kay nadahig sa pagpangdakop ug pagturtyor sa gituohang aktibista, pagkidnap ug pagpatay ug daghang pagpangabuso sa tawhanong katungod.
Ang unang gipangdakop ug gipangturtyor mao ang gitawag nga “First Quarter Storm” nga kasagaran mga batan-on ug estudyante nga mao say nag-organisa sa mga mamumuo sa kalungsoran ug magbabaol sa kabanikanhan aron lumpagon ang madaugdaugon nga rehimen ni Marcos nga gisuportahan sa America.
Human sa 30 ka tuig, lain na usab nga klase sa Martial Law ang atong nasinatian.
Naa gihapon ang kabangis, ilabi na ang giyera batok ilegal nga druga.
Apan nunot niini kay ang giyera batok kapobrehon, kurapsiyon sulod sa gobyerno, mga politiko ug opisyal nga nagpaburot sa ilang bulsa sa posisyon, pagduso sa programang imprasraktura nga gikinahanglan kaayo sa nasud, pagbugkos sa pakighigalaay sa China ug Russia, pag-aprobar sa Bangsamoro Organic Law ug pagpabalik sa hinabing pangkalinaw sa Marxist-Leninist nga grupo ni Jose Maria Sison.
Gikastigo sab sa Department of Interiors and Local Government ang mga lokal nga kagamhanan nga way nahimo sa problema sa druga, kurapsiyon ug kapobrehon sa ilang lugar.
Dinhi sa Davao may laing martial law nga gipahamtang ni Mayor Inday Sara para sa mga badlungon sa kalsada. Mabasa nato kini sa mga flyover sa dakbayan nga kinsa kadtong nadisgrasya sa motorsiklo tungod kay hubog ug walay helmet ug modangop sa tambalanan dili mahatagan og suporta sa Lingap Para sa Mahirap Program.
Para kanako sakto sab ning gihimo sa atong Mayor. Tonyo no nga ang gobyerno pa ang mobayad sa inyong kabuang?
Atong nahibaloan nga hastang taasa sa aksidente sa motorsiklo, kadaghanan kanila hubog ug walay helmet, walay lisensiya ug paso o walay rehistro ang motor. Tagam sa gahi’g ulo.