BIKTIMA sa sunod-sunod nga pagpamatay sa mga motor-riding suspect ang wa pa mahatagi og hustisya, ilabi na suspetsado wa pa masikop.
Awhag sa pangulo sa Commission on the laity sa simbahan sa Sugbo, Fe Barino, nga dili lang hunongon ang pag-ampo alang sa kalinaw.
Gitug-an ni Barino nga bisan pa man nga taud-taud na nga gipangadye ang Oratio Imperata alang sa kalinaw diha sa mga simbahan sa katoliko, apan hangtud karon nagpadayon ang mga pagpatay.
“Sa tinuod lang duna tay Oratio Imperata but only God knows, kahibalo gyud ta nga ang Ginuo wala matulog nagtan-aw siya nato, dili lang gyud ta mohunong og pag-ampo,” tipik sa pamahayag sa opisyal.
Iyang gi-awhag ang nagkalain-lain nag pundok nga dili hunungon ang pag-ampo kay siya masaligon maangkon ra sa dili madugay ang kaluwasan sa nasud.
Usa sa programa ni Barino ug kaubanan sa komisyon, mao ang pagtabang sa mga kanhi drug addict o bisan na kadtong mga na-adik sa pag-inom sa ilimnong makahubog, sigarilyo ug sa uban pangbisyo.
Siya ug kaubanan nitug-an nga kon ang mga law enforcement agency subsob sa ilang pagpahigayon sa anti-criminality operation ilabi na sa mga nalambigit sa ilegal nga drugas, sila usab ang wala maluya alang sa pagtabang niadtong mga nagumon sa bisyo ug karon buot na nga magbag-o.
Gani niadtong Dominggo, Pebrero 24, gihimo nila ang ika-pito na ka bulan nga pagpahigayon og Big Day kon panagtigum sa mga pasyente nga kanhi nagumon sa drugas ug nga karon nipaubos og rehabilitasyon sa bisan asa nga center o clinic sa Sugbo. (FMD)