SO, BISAN pa man og gisungog ang preparasyon sa Team Pilipinas alang sa Fiba Asian Qualifiers, apan gisukli-an ra gihapon kini og maayong resulta.
Giharos nila ang nahabilin nilang duha ka duwa sa ikalimang bintana sa qualifying stage nga maoy nag-abli sa pultahan alang sa Fiba World Cup nga ipahigayon sa China.
Niadtong Huwebes, way kaluoy nilang gimakmak ang Qatar, 84-46, ug sa pagka Dominggo gibawsan nila ang Kazhakstan, 93-75, sa Republican Velodrome Saryarka sa Astana, Kazakhstan.
Mibulig sa ilang kadaugan aron masulod sa World Cup mao ang kadaugan sa Korea, 84-72, batok sa Lebanon, kay kon midaog pa ang Lebanon, mabanlas ang paglaom sa Pilipinas alang sa World Cup karong Septiyembre.
Pero ang nasentro sa kadaugan mao ang naturalized player nga si Andray Blatche kinsa sa pagbanos ni coach Yeng Guiao sa renda sa National squad, giplanohan n nga ilisan isip reinforcement.
Kini tungod kay sa uwahing duwa niini dili impresibo ang gipakita ug wala pirme sa kondisyon.
Mitumaw usab ang pagduda nga wala kini kasingkasing alang sa nasod ilabi na niadtong wala kini mokuyog sa team alang sa Fiba Asia Cup nga gipahigayon sa Agusto 8-20 sa niaging tuig.
Kining tanan wala malilong ni Blatche kinsa nahiubos ug nasagmuyo sa maong desisyon ni coach Guiao.
Tuod man, sa 5th window sa Asian Qualifier, wa si Blatche ug gitistingan ni Guiao ang mga Fil-Ams nga sila si Christian Standhardinger ug Stanley Pringle nga maoy motapak sa luna ni Blatche.
Nakapakita man tuod og saktong labok ang duha, ilabi na sa opensa, apan daghang mga tipik sa departamento nga dili sila mohaom sa nahimo ni Blatche.
Ang ilang kakuwang sa liderato sulod sa korte, ang gidak-on ni Blatche sa iyang position nga maka-attract og dobling depensa sa kontra, ug ang pag-set og mga plays aron mabakante ang kauban, maoy hiyas nga wala kanila.
Sa laktod nga pagkasulti, kiwang ang team kon wala si Blatche.
Apan sa dihang anaa na sa talandugon nga sitwasyon ang Team Pilipinas, gibakwi ni coach Guiao ang iyang giplano aron lang pagsalbar sa nasod.
Nasabutan ang pagkuha og balik ni Blatche kinsa daan nang mipadayag sa iyang kaandam.
Pilay dagan sa istorya, miabot sa Pilipinas si Blatche, apan tungod sa iyang obligasyon sa iyang mother team sa China, wala mahingpit ang ensayo niini sa ubos ni Guiao.
Kinahanglan mobiya una siya sa nasod aron moduwa sa China Basketball Association (CBA) ug moapas na lang sa Qatar alang sa duwa sa Gilas.
Apan taliwala ning tanan, napakita ni Blatche ang kalidad nga nakapabilib ni Guiao ug sa tibuok yutang Pilipinhon.
Batok sa Kahzakstan, sulod lang sa unang sais minutos, si Blatche aduna nay 17 puntos nga gilamasan og lima ka tres ug sa kinatibuk-an mikulikta og 41 puntos.
Ang presensiya ni Blatche sulod sa korte nakahatag usab og kompiyansa sa iyang kaubanan. Gani sa dihang na foul trouble siya, sila si Jayson Castro, June Mar Fajardo ug Marcio Lassiter nga giabagan nila ni Troy Rosario ug Marc Barroca maoy mitubos sa temporaryong haw-ang nga nabiyaan sa 32-anyos ug 6-11 nga Blatche.
Sa ato nang gikaingon nga lahi ang team kon wala si Blatche, pero unsa kaha og madugang si Jordan Clarkson ning maong lineup no?
Sa Septiyembre gikatakda ang World Cup sa China ug ning buwana, kon wala lay kausaban, bulan usab kini sa bakasyon o break sa National Basketball Association (NBA).
Sukwahi nila ni Standhardinger ug ni Pringle, si Clarkson mi-qualify sa Fiba isip local player tungod kay aduna na kini passport sa Pilipinas niadtong nagpangidaron pa siya og 16 anyos. Mao ni rason nganong nakaduwa ug impresibo usab siya sa niaging Asian Games.
Ang Fiba mitugot lang og usa ka import o naturalized player sa usa ka team. So, hayag ang posibilidad nga mahitabo ang panagkauban ni Blatche ug Clarkson sa Team Pilipinas - duha ka players nga may igong kasinatian sa NBA.
Sa World Cup gipaabot nga magpalig-unay na ang team. Pipila ka mga players sa NBA ang moduwa sa ilang tagsatagsa ka mga gigikanan nga nasod. Duna usay uban nga nagpa-naturalized player.
Ang Pilipinas, with Blatche and Clarkson around, is a team to watch sa World Cup.
Hinaot nga makahunahuna ang Samahan Ng mga Basketbolista sa Pilipinas (SBP) ug sa mga basketball stakeholders niini.
Kini maoy atong paabuton mahitabo. (junmigs0622@yahoo.com)