TACLOBAN CITY-- Kapin sa tunga sa milyon nga kantidad sa ilegal nga drugas ang nasakmit sa gihimong drug bust operation sa Tacloban City Police Office ug Philippine Drug Enforcement Agency (PDEA)- Eastern Visayas.
Si Police Senior Inspector Edwin Cañamaque, hepe sa Station 2, miila sa suspek nga si Jeffrey Macaso, alyas “tol/jef,” 37, taga 109-A V and G subdivision, Tacloban City.
Matod sa Police Regional Office- Eastern Visayas, bag-ong naila nga drug personality ang suspek.
Gumikan sa mga nakuhang intelligence report sa ilegal nga kalihukan niini, gipaubos sa surveillance ang suspek.
Nakompirmar sa kapulisan ang maong report busa gihimo ang plano sa pagsikop sa suspek.
Alas 5:10 Lunes sa hapon, Pebrero 25, gipahigayon ang drug bust nga pinangulohan ni Police Inspector Angel Romeo Caones sa Station 2-DEU batok sa suspek didto sa dalan Pantak eskina Turobay, Phase 4 sa V and G subdivision.
Usa ka posuer buyer ang nipalit sa suspek gamit ang mga peke nga tag P500 nga salapi.
Nagpasitibo ang transaksyon hinungdan nga gipalibotan sa mga operatiba ang suspek.
Una nga nakuha ang usa ka pakete nga may gituhoang shabu ang napalit sa poseur buyer.
Atol sa pag rekisa nasakmit ang dugang 20 ka pakete nga may gituhoang shabu.
Matod sa PDEA- Eastern Visayas, mitimbang tanan og 100 gramos ang nakuhang ilegal nga drugas ug dunay market value nga P680,000.
Gisusi karon sa kapulisan ug PDEA diin gikan ang suplay sa drugas nga nakuha gikan sa suspek.
Naa na karon sa kustodiya sa Tacloban Police Station 2 ang suspek kinsa nag atubang og kasong kalapasan sa Republic Act 9165.