MGA kawani sa Mandaue City Drug Rehabilitation Center ang posibleng mangunay sa pagduaw sa kada barangay aron mas magpaduol sa mga drug-addict nga buot mo-avail sa libre nga medical treatment.
Kini human nasuta nga hangtud karon, wala pa'y bisan usa nga moduaw sa pasilidad.
Gitug-an ni Mandaue City Administrator Atty. Danilo Almendras nga usa kini sa natuki atol sa ilang binuwan nga City Peace and Order Council ug City Anti-Drug Abuse Council meeting, Martes sa buntag, Pebrero 26.
Ang Drug Rehabilitation Center nga nahimutang sulod sa compound sa Mandaue City District Hospital sa Barangay Centro, duol sa Mandaue City Police Office, ang gigastuhan og P2 milyon sa Department of Health.
Nahuman ug gisubhan kini niadto pa katapusan sa Nobiyembre sa niaging tuig.
Usa sa nakita nila nga problema ang posibleng kaulaw sa mga pasyente nga buot mo-avail sa libre nga medical treatment sulod sa upat ka bulan ug posible ang pagtuyo gyud sa lugar, ilabi na niadtong mga pasyente nga dili suportado sa pamilya.
“Siguro usa na nga maulaw sila, kay walk-in man, o tungod layuan ra ba sila. Pero sayang man gud kay naa na gud na, naa tay pasilidad. So ako sila giingnan nga kon wala gyud gihapon ning’ bulana, sila na ato paadtuon sa barangay o dugang information dessimination pa ba kinahanglan,” gitug-an ni Almendras.
Hinungdan nga ang mga barangay opisyal ang gihangyo nga mas moawhag pa sa ilang mga nailhan nga mga drug user nga buot magbag-o nga mo-avail niini. Apan kon dili gyud, mismo ang mga duktor, nars, psychologist ug psychiatrist ang motuyo sa kabarangayan.
Hinuon sa mga community-based rehab program, dugang 380 na usab ka mga nipaubos niini ang ni-graduate ning bulana ug gitabangan na karon sa City Social Welfare Services ug sa Mandaue Public Employment Services Office.
Aron usab sila kahatagan og trabaho o panginabuhian, alang na sa ilang hingpit nga pagbag-o.
Dili sila madugang sa mga tawo nga masikop o di ba kaha mamatay tungod sa kalambigitan sa drugas.
Human usab giangkon sa Mandaue City Police Office (MCPO) nga nikunhod og 1.5 percent ang crime volume sa syudad sa mga bulan sa Enero ug Pebrero ning tuiga, itandi sa niagi nga tuig. Apan taas lang og ihap sa murder og lima, ikompara sa niaging tuig.
Matud ni Supt. Ryan Devaras ang Deputy City Director for Operations sa MCPO nga ang pagtaas kasagaran tungod sa patay nga may kalambigitan sa ginadili nga drugas.