DUHA ka mga panghitabo ang gibantayan sa mga tigpaniid sa politika.
Una, kaniadtong miaging Domingo atol sa pagbisita ni PRRD dinhi sa Cebu, giisa ni PRRD ang mga kamot ni Kongresista Gwen Garcia ug ni Daphne Salimbangon nga mao ang mga kandidato sa PDP-Laban sa pagka-gobernador ug bise gobernador sa lalawigan sa Sugbo.
Ikaduha, sa mao gihapong adlaw, giisa usab ni kanhi Bise Mayor sa Davao Polong Duterte ang mga kamot ni kanhi CabSec Toloy Evasco Jr. ug mga kaubanan atol sa pagbisita niini sa lungsod sa Panglao.
Nganong gibantayan man kini?
Sa nahitabo sa Cebu, gibantayan ang pag-isa sa kamot ni Cong. Gwen ug sa iyang running-mate tungod kay adunay mga pangutana nga nagpaluyo sa maong pag-isa sa kamot.
Una, giisa ba ang mga kamot isip personal nga pag-endorso ni PRRD o giisa kini tungod kay mga kandidato sila sa PDP-Laban?
Atong nahibaw-an nga opisyal si PRRD sa PDP-Laban.
Ikaduha, kon giisa ni PRRD ang mga kamot nila ni Gwen Garcia ug Daphne Salimbangon, nagpasabot ba kini sa iyang suporta kanila bisan pa o taliwala sa iyang relasyon ni Bise Gobernador Agnes Magpale nga nagpapili pagka-gobernador?
Buyno, dayag na kaayo nga kay giisa na man ni PRRD ang mga kamot nila ni Gwen Garcia ug Daphne Salimbangon, dili na mahitabo pa nga iisa usab ni PRRD ang mga kamot nila ni Agnes Magpale ug ni Junjun Davide sa umaabot pa nga mga adlaw.
Migawas na man ang mga hulagway sa pag-isa sa kamot sa mga pamantalaan pagka-sunod adlaw, segurado nga mogawas usab ang maong mga hulagway sa mga tarpaulin nga himoon nila ni Gwen og Daphne atol sa ilang pagkampanya.
Sa makakita sa maong mga hulagway, dili na ikalimod ngadto sa mga misuporta sa kandidatora ni PRRD sa miaging piniliay og kinsay gipaluyohan ni PRRD karong umaabot Mayo 13.
Samtang didto sa lalawigan sa Bohol, makatabang ba sa kandidatora ni Evasco ug mga kaubanan ang pag-isa sa ilang mga kamot ni kanhi Bise Mayor Polong Duterte?
Daghan ang nagtuo nga makatabang kay anak ni PRRD si Polong ug dili ikalimod nga suod sa pamilya ni PRRD si Evasco.
Dunay laing pangutana.
Kay giisa na man ni PRRD ang kamot ni Evasco atol sa iyang pagbisita sa Bohol kaniadtong Nobiembre 27 sa miaging tuig, mahitabo kaha nga iisa pag-usab ni PRRD ang mga kamot ni Evasco ug mga kaubanan sa umaabot nga mga adlaw?
Importante ba kining pag-isa o pag-saka sa mga kamot panahon sa kampanya?
Depende kon kinsa ang nag-isa sa kamot, di ba?
Kon hilabihan ka popular ang mag-isa sa kamot, segurado nga makatabang kini.
Mao kining panahona nga inilog ang iyang pag-anha sa mga lain-laing lugar.
Mao kana ang sitwasyon ni PRRD karon.
Bisan asa siya moadto, kanunay dugokon sa mga tawo si PRRD tungod kay nagpabilin ug wala mawala ang iyang pagka-idolo sa bayan bisan pa sa mga kontrobersiyal nga mga pulong nga gilibkas ug ingon man ang pipila ka mga kontrobersiyal nga gihimo ni PRRD.
Unya kon hunahunaon ra ba, dili na siya ang kandidato.
Gets?