MISAMOT ang hugyaw sa kalampusan sa Team Pilipinas sa bag-uhay lang mitiklop nga 2019 FIBA World Cup Asian qualifiers human mipadayag sa iyang interes si Fil-Am Jordan Clarkson nga moduwa sa national squad alang sa kampanya niini sa prestihiyusong FIBA Basketball World Cup.
Nagkanayon si Clarkson, kinsa usa sa mga sinaligan sa Cleveland Cavaliers sa National Basketball Association (NBA), nga nagbukalbukal ang iyang kalipay human giharos pagdaog sa Team Pilipinas ang ilang duha ka mga tahas sa 6th window sa Asian qualifiers batok sa hosts Qatar ug Kazakhstan ning bag-uhay lang.
Ang mga daog maoy nagpa-qualify og balik sa Team Pilipinas alang sa FIBA Basketball World Cup nga ipahigayon sugod karong Agusto 31 sa China.
Si Clarkson, kinsa niduwa sa Team Pilipinas sa 2018 Asian Games sa Indonesia, migamit sa social media aron ipadayag ang iyang gibati.
“Congrats to my bros and the country. Such an honor for the country qualifying for the World Cup. So hyped. Hope to see you guys in China!!!” mensahe ni Clarkson sa iyang Instagam account nga giubanan og hulagway sa iyang kaugalingon nga nagsul-ob uniporme sa Gilas Pilipinas.
Giplano nang daan sa kadagkuan sa basketball sa nasod nga mag-uban sila si Clarkson ug naturalized player Andray Blatche sa Team Pilipinas alang sa kampanya niini sa matag upat ka mga tuig nga kompetisyon.
Apan lisod kining tumanon gumikan sa balaob sa FIBA nga usa ra ka naturalized player ang itugot sa matag nasod.
Tataw man tuod nga adunay dugong Pinoy si Clarkson apan basi sa patakaran sa FIBA, dili kini makonsiderar nga usa ka lokal nga magduduwa gumikan kay wala kini nakabaton og Philippine passport sa wala pa kini nag-edad og 16 anyos.
Nagpasabot lang kini nga makaduwa lang si Clarkson sa Team Pilipinas kon himuon kining naturalized player.
Hinuon gipasalig sa Samahang Basketbol ng Pilipinas (SBP) nga buhaton nila ang tanan nilang makaya aron makaduwa si Clarkson sa Team Pilipinas kauban si Blatche, kinsa kanhi magduduwa sa NBA.
“We have been trying to convince or discuss the matter with FIBA,” matod ni SBP president Al Panlilio sa interbyu sa AFP.
“Everyone is working on the matter and we will do everything we can to make it happen. Based on our constitution, he is Filipino. He has a passport. But he got it after he was 16 years old.”
Kon naa sila si Clarkson ug Blatche, gilauman nga makasukol og insakto ang Team Pilipinas batok sa lig-ong teams sa tibuok kalibutan. (ESL)