GIPAKAGAMAY ni mayoralty candidate sa Lapu-Lapu Engr. Rolando Patalinjug ang pag-isa ni Presidente Rodrigo Duterte sa kamot sa iyang kaatbang nga si Pajo Barangay Kapitan Junard Chan, standard bearer sa PDP Laban.
“Di na buot pasabot nga once i-isa (kamot) ka, daog ka. Ako bitaw pildi man ko, gi-isa ko sa presidente (Duterte),” matod pa ni Patalinjug kinsa magpapili ubos sa United Nationalists Alliance (UNA).
Nasayran nga si Patalinjug maoy kanhi PDP Laban mayoralty candidate niadtong 2016 election apan naparot human nga midaog si incumbent Mayor Paz Radaza.
Gibutyag sa maong kandidato nga wa mailhi sa presidente si Chan kinsa kanhi sakop sa Liberal Party sa miaging piniliay, ug nahimo lang nga kandidato sa PDP Laban karon gumikan sa iyang lig-on nga backer nga si Secretary Adelino Sitoy, kinsa maoy Presidential Adviser on Legislative Affairs.
Hinuo n gi-angkon ni Patalinjug nga advantage alang niadtong adunay endorsement ni Duterte apan ang mga Oponganon maoy mohukom sa kandidato nga ilang pili-on atol sa adlaw sa eleksiyon.
Samtang si Chan sa iyang bahin mitubag nga nagpa-ila lang ang reaction ni Patalinjug nga nalisang sa maong kalambuan human siya gituboy sa presidente.
“Nagpakita to siya (pagtuboy) nga ang official nga kandidato sa Lapu-Lapu mao ang Team Libre,” matod pa ni Chan.
Iyang gisalikway ang pamahayag sa iyang kaatbang nga dili pa siguro ang iyang winnability.
“At that time the president dili pa siyay naglingkod but karon siya nay naglingkod ug napakita na niya sa katawhan ang iyang leadership,” pasabot ni Chan.
Giklaro sa kapitan nga base sa hulagway diin wa ibabaw sa entablado atol sa campaign rally mahitabo ang pagtuboy ni Duterte kaniya, kay matod pa nga gikapoy ang presidente sa upat ka oras niining nga kalihokan.
“Way makadiktar sa presidente nga i-isa ang akong kamot, kagustohan to ni Duterte. Bisan pa didto mi sa kakahoyan (Plaza Independencia),” saysay ni Chan. (FVQ)