NISAKA ngadto sa 88 porsiyento ang gidaghanon sa shabu nga nasakmit sa Police Regional Office Central Visayas (PRO 7) gikan sa Enero ngadto Pebrero karong tuiga kon itandi sa susamang mga buwan sa miaging tuig.
Kini taliwa sa ila pang gihingusgan og maayo nga kampanya batok sa illegal drugs.
Sa gipahigayon nga forum sa AGIO-PIA 7, misaysay si Wardley Geltalla, ang acting Regional Director sa Philippine Drug Enforcement Agenc Central Visayas, nga nga nakakumpiskar sila og 18 ka kilo sa shabu sa miaging tuig mga mokantidad og P150 milyones.
Ingon niya nga aduna silay nadawat nga mga report nga ang drugas makasulod sa Rehiyon 7 pinaagi sa mga pribadong pump boats ug mga barko sa mga dapit nga way mga awtoridad nga nagbantay.
“We received some reports that the drugs are entering Cebu through private pump boats or marine vessels in areas not monitored by the law enforcement and to the coastal areas that do not have port authorities,” saysay niya.
Nasuta nila nga ang tinubdan sa mga drugas nga maabot diri sa rehiyon nagagikan sa National Capital Region (NCR) ug sa Mindanao.
Matod niya nga adunay nitug-an sa mga nasikop nga bayranan nila ang mga awtoridad sa dunggoanan aron makalusot ang mga drugas. Kasagaran nila, mga roro ang gamiton sa pag dungo niini.
Tungod niini, magdungag sila ug pito ka mga K9 units aron mapugngan ang mga palusot sa mga drugas sa mga airports ug mga dunggoanan.
Sa miaging tuig, adunay 312 nga mga high value targets ug 35 ka mga high impact operations ang nadakpan sa PDEA 7.
Si PSupt Ma. Aurora Rayos, information officer sa Police Regional Office Central Visayas (PRO 7), miingon nga sa dili pa sila manakop, ila una suta-on ang mga kapolisan nga nalambigit sa pag gamit sa drugas.
Sigon niya nga nagpahigayon sila ug surprise drug test sa tanan kapolisan sa Rehiyon 7.
“Giuna gyud nang RD (Regional Director) ang tugkaran kay unsaon man nato nga modiretso ta sa gawas nga wa man ta nanglimpyo sa atong tugkaran. Diba mas ulaw paminawon nga ingnon ta sa katawhan na adik man diay tong pulisa,” pasabot niya.
Adunay silay 54 ka mga kaso nga naglakip sa mga Absent Without Leave (AWOL) ug sa anaay kalabutan sa drugas, 42 niini ang nasulbad na ug 12 pa ang pending pa hangtod karon.
Sa karong tuiga, anaay 10 ka mga kaso kalabot niini ug kini tanan pending pa. Sugod sa tuig 2017 hangtod 2019, aduna nay 34 ka mga kapolisan ang nakasohan kalabot sa drugas sa tibuok Central Visayas. (Jolissa Mae Taboada, USJR Intern)