GIPASAKAAN na og kasong kalapasan sa Section 12 ug Section 15 sa Republic Act 9165 kun Comprehensive Dangerous Drugs Act of 2002 ang opisyal sa Bureau of Jail Management and Penology (BJMP) Davao del Sur nga nagpositibo sa paggamit og ilegal nga druga atol sa gipahigayong Oplan Galugad sa Davao City Jail, Sabado sa buntag.
Giingon ni PDEA-Davao director Antonio Rivera, nga Martes sa buntag, Pebrero 26, gipailawom na sa summary inquest proceedings sa piskalya si jail Chief Inspector Roman Hernandez.
Sumala ni Rivera nga nakalapas sa Section 12 ug 15 sa RA 9165 ang maong opisyal diin kini ang paggamit sa ilegal nga druga ug pagkarekober sa mga drug paraphernalia sa paggamit niini.
Di lamang kasong kriminal ang atubangon sa maong opisyal apil na ang kasong administratibo nga ipasaka kaniya sa ahensya kung asa siya konektado.
Kahinumdoman nga dungan sa Oplan Galugad, natigayon ang random drug test diin migula nga walo ka mga priso ang nag-negatibo ug ika-siyam mao si Hernandez. (Richy F. Nalagon)