TULO ka mga establisemento sa Mantawi Drive, Barangay Tipolo, Dakbayan sa Mandaue, gipasirad-an sa kagamhanan sa Dakbayan.
Ang Big Hotel, Big Hotel Suites ug Linear coffee shop gipasirhan kay way business permit.
Kini tungod kay giingon nga ang gitindugan nga luna nga iya sa Siyudad sa Mandaue wa nakakontrata sa mao nga mga establisemento, apan sa laing kompaniya.
Ang kompaniya nga maoy orihinal nga nag-abang sa Siyudad, nipaabang niini sa laing kompaniya nga way pagtugot sa Konseho sa Siyudad.
Pasado alas 9, Miyerkules sa buntag, Pebrero 27, unang gipasirad-an o gipataptan og closure order sa Mandaue City Legal Office ang Linear coffee shop kilid sa entrance sa Big Hotel.
Gisunod ang Big Hotel Suites una pa ang sa Big Hotel.
Apan pagsusi sa Superbalita Cebu mga alas 4 pasado sa hapon, padayon nga nag-operate ang Big Hotel samtang ang abogado niini makigtagbo sa Siyudad karong adlawa.
Gipasabot ni Atty. Elaine Bathan, chief of staff ni Mandaue City Mayor Luigi Quisumbing, nga sugod pa sa 2018, wa na ma-renew ang business permit sa maong mga establisemento.
‘KWESTYONABLE’
Nasuta sa Siyudad nga kwestyonable ang mga kontrata nga gisudlan sa mao nga mga establisemento sa paggamit sa luna nga gitindugan niini.
Ang Big Hotel, ubos sa Travel Bee Management Corp. nga affiliated sa Cenore Corp., nisud og deed of assignment tali sa Katumanan Hardware niadtong 2013.
Ang luna adunay 1.4 ektaryang kun 14,000 metro kwadrado, kanhi gipaabangan sa Mandaue City Government niadtong 2007 sa Katumanan Hardware.
Nag-abang lang sila sa Siyudad og P12 matag metro kwadrado kun dul-an P170,000 kada buwan.Ang kontrata sud unta sa 15 ka tuig.
Niadtong 2012, nisud ang Katumanan og laing kasabutan tali sa Mandaue City Government alang sa pag-extend sa kontrata og dugang 25 ka tuig.
Sa 2013, nisud ang Katumanan Hardware og kontrata kun gipa-sublease kini ngadto sa Cenore Corp. aron maoy mopalambo sa commercial nga aspeto sa lugar.
Nihatag og deed of assignment ang Katumanan sa Cenore, nga gipirmahan ni kanhi mayor ug karon Cong. Jonas Cortes.
Gipasabot ni Bathan nga gihimo kini bisan wa gihatag nga pagtugot kun authority gikan sa Sangguniang Panglungsod (City Council).
Sa miaging tuig, gikanselar sa Kagamhanan sa Siyudad ubos sa administrasyon ni Mayor Luigi Quisumbing ang ilang kontarta tali sa Katumanan tungod sa giingong kalapasan.
Ilang giawhag ang Cenore nga maoy mosud og kontrata direkta sa kagamhanan, aron mahatag ang tinuoray nga kwentada sa kantidad sa maong luna.
Dugang ni Bathan nga ning tuiga, pag-appraise sa City Assessor sa luna, mokantidad og tag P1,500 ngadto sa P2,000 matag metro kwadrado na unta kini, nga layo kaayo sa P12 nga abang.
Ang P12 matag metro kwadrado nalatid sa kontrata tali sa Siyudad ug Katumanan Hardware.
Inay nga motahod, giingong nga nilahos ang kadagkuan sa Cenore Corp. sa pagpadala og suwat sa majority sa Konseho alang sa pagpa-ratify sa giingon nga kontrata niini kaniadto tali sa Katumanan.
Ang mao nga kontrata kaniadto ra unta gipaaprobahan ni Cortes sa Konseho nga wa mabuhat.
Niingon si Bathan nga dako og alkanse ang Siyudad sa Mandaue sa transaksyon tali niini ug sa Katumanan Hardware.
Dugang ni Bathan, nga mismo ang Commission on Audit (COA) na usab nipagawas sa ilang report nga adunay nalapas ang Katumanan Hardware sa ilang gisudlan nga deed of assignment sa Cenore Corp.
Kinahanglan makahatag ang City Hall og gi-amendar nga kontrata nga aprubado sa Konseho.
Iyang giklaro nga di pagpanggukod ang ilang gibuhat karon.
“We are not against the business operation of Big Hotel. As a matter of fact, we have extended several concessions and allowed meetings, gave them due process, gave them enough and ample time, gave them enough time to comply with the notice. Because klaro to sa atong resolution nga we enter into a new contract of lease with them. In fact, atong COA findings will confirm nga defective gyud ang among deed of assignment,”matod ni Bathan.
Dugang niya nga buot lang sa mayor nga makuha gikan sa mga patigayon sa dakbayan ang insakto nga alang sa Mandauehanon.
“And all, what the mayor wanted that all assets sa atong Siyudad is well protected and that we are able to maximize the resources of the City,” pasabot ni Bathan.
Sa ilang bahin, gipasabot ni Atty. James Calipayan, chief of staff sa kanhi mayor ug karon kongresista Cortes, nga wa na kinahanglana pa ang approval sa City Council alang sa pagpirma ni Cortes sa deed of assignment, ngadto sa Cenore.
Ang Katumanan Hardware tig-supply og mga kahoy ug ubang hardware materials sa Sugbo gikan sa Mindanao.
Gitug-an ni Calipayan nga human nga giabli kaniadto ni Cortes ang plano sa pag-revitalize sa lugar sa Mantawi Drive pinaagi sa pagpahimutang og commercial establishments, human sa usa katuig sa pag-extend sa kontrata, ang Katumanan ang giingon nga niangkon nga di nila makaya, kay wala silay expertise sa pagpadagan og commercial business.
Busa, ilang gisultihan ang Katumanan nga mahimo kining ipadala sa usa ka affiliate o subsidiary nga sama ra og mga board of director.
“So we told them that it is in your contract of lease nga you can assign this to an affiliate or subsidiary. In which case, if it is subsidiary more or less we are dealing of the same board of directors, nga kauban ra sa Katumanan Hardware. So Katumanan hardware turn to Cenore, they assigned a contract of lease,” matod ni Calipayan.
Matod niya nga sa ilang legal nga interpretasyon wa na kinahanglanang mananghid ug tugtan pa sa Konseho ang kontrata.