DUHA ka mga pulis sa dakbayan sa Sugbo ug laing duha ka sibilyan nasikop sa entrapment operation sa mga sakop sa Criminal Investigation and Detection Group 7 human mamaligya og armas nga hupas na ang lisensya.
Ang unang nangadakpan pasado alas 10 sa gabii sa Pebrero 26, sa F. Ramos Street, Barangay Cogon Ramos mao silang PO1 Oliver Baguia Navarro Jr, 40 , taga C. Padilla St., Cebu City, nadestino sa Mobile Patrol Group sa Cebu City Police Office; Agustin Nautan, 27, taga Brgy. Paknaan, Mandaue City, apan lumad nga taga Zone Taugkong, Panabo City, Davao del Norte; ug Dennis Juntilla Escaran, 40, taga P. Del Rosario Extension, Cebu City.
Human sila masikop, nitahan si PO2 Redzon Baguion, taga Pardo, sakop sa Abellana police station 2.
Tulo ka mga armas ang nakuha kanila atol sa entrapment.
Matod ni Sr. Supt. Royina Garma, hepe sa kapulisan sa Siyudad sa Sugbo, si PO2 Baguion niprenda sa iyang kaugalingong kalibre .45 nga pistola ngadto kang Navarro.
Apan sa dihang gipalukat na unta kini wala na siyay ikabayad.
Nimando na lang si Baguion nga ipabaligya tungod kay wa na siyay ikalukat.
Nangita og mopalit si Navarro pinaagi sa iyang kaila nga mga sibilyan.
Gipabaligya ra kini ni Navarro og P25,000 sanglit original man ang maong armas.
Wa magdahom silang Nautan ug Escaran nga ang ilang gibaligyaan sa armas pulis na diay sa CIDG-7.
Sa ilang panagkita duol sa usa ka hotel sa F. Ramos Street, gidakop dayon sila.
Nimando na dayon si Garma nga imbargohan sa ilang service firearms ang duha ka mga pulis lakip na ang ilang mga ATM cards aron ipa-process nga dili na sila mahimong makadawat sa ilang sweldo.
Matod ni Garma nga mahimong ikataktak sa trabaho sa duha ka mga pulis ang ilang giatubang karon nga kaso sanglit nakalapas kini sa Commission on Elections (Comelec) gun ban nga walay pyansa nga gitugot.
“So, we are now preparing yung admin case na ipa file doon sa dalawang police and we are also waiting sa complete investigation na gagawin ng CIDG in support sa admin case na pini-prepare namin for grave misconduct,” matod ni Garma.
Si Baguion aduna nay pending administrative nga kaso sa Investigation and Detective Management Branch human nasakpan nga nagduwa sa iyang cellphone samtang si Navarro mihawa sa iyang pwesto. (AYB)