HEPE sa kapulisan sa syudad sa Sugbo mimando karon sa tanang chief of police sa onse ka police station nga susihon ang mga sakyanan sa barangay nga adunay blinker ug wangwang human mipagawas ug order si President Rodrigo Duterte sa pagdili sa paggamit niini kung dili sila otorisado.

Nakadawat og kamandoan ang kapulisan sa Central Visayas nga estriktong ipatuman ang presidential decree 96 nga hugot nga gidili ang pag gamit sa blinkers ug wangwang sa mga sakyanan nga dili mga tinugyanan sa balaod.

Matod ni Sr. Supt. Royina Garma nga iya nang gipasupot ang maong kamandoan sa tanang mga station commanders sa onse ka pulis station sa siyudad sa Sugbo nga susihon ang mga sakyanan sa mga barangay.

Ang gitugotan lang sa balaod nga magtinir sa wangwang ug blinker mao ang bombero, patrol car sa police, ambulansya ug ubang ahensya sa gobyerno nga gitugotan nga makagamit niini.

Tungod niini, nanawagan si Garma sa mga kapitan nga tumanon kini kung dili sila gusto nga ang police na ang mopugos sa pag imbargo sa ilang mga wangwang ug blinkers.

“Nanawagan ako sa lahat ng barangay captain remove your blinker before tayo magka pahiyaan because after my meeting today Pebrero 27) i will direct all station commanders to check all vehicles na hindi authorize magkaroon ng blinkers and wangwang, ipapabaklas ko yan ipa isyohan ko ng TOP pati ang driver,” matod ni Sr. Garma.

Adunay nabantayan si Garma nga mga sakyanan sa barangay nga adunay blinker ug wangwang.

Lakip sa iyang gidili mao ang pagpasul-ob sa mga uniporme sa barangay tanod nga adunay marka sa luyo nga barangay police.