SECTIONS
Tuesday, July 23, 2019
SUPERBALITA CEBU

Dream team sa Pilipinas gihandom

NANGHINAOT si Team Pilipinas coach Yeng Guiao nga iyang maporma ang giingong “Dream Team” nga bersyon sa Pilipinas alang sa 2019 FIBA Basketball World Cup nga ipahigayon sa China sugod karong Agusto 31.

Ang puwersa nga gihandom ni Guiao pangulohan sa sinaligang Fil-Am sa Cleveland Cavaliers nga si Jordan Clarkson ug naturalized player Andray Blatche.

Sa managlahing higayon, sila si Clarkson ug Blatche pareho nang nagiyahan ni Guiao apan ning higayuna, nagtinguha ang bantugang coach nga magkadungan og duwa ang duha ka mga basketbolista ubos sa iyang pagdumala.

“That would be our version of the dream team,” matod ni Guiao.

Si Guiao maoy nihulip ni Chot Reyes isip coach sa Philippine national team human sa karambola nga nahitabo tali sa Gilas Pilipinas ug Australia niadtong Hulyo 2 sa miaging tuig sa World Cup Asian qualifiers.

Nakuha niya si Clarkson aron moduwa sa Team Pilipinas alang sa Asian Games diin igo lang naangkon sa team ang ikapitong dapit.

Niadtong higayuna, kadaghanang mga sakop sa Team Pilipinas nagagikan sa Rain or Shine Elasto Painters nga kanhi gigiyahan nga puwersa ni Guiao sa Philippine Basketball Association (PBA).

Niadto sab higayuna, adunay mga nahibulong kon nganong wala gikuha ni Guiao si Blatche, nga dugay na man unta kining nagduwa sa nasod isip naturalized player.

Hinuon sa 6th window sa World Cup Asian qualifiers ning bag-uhay lang, gikuha na’g balik ni Guiao si Blatche apan wala si Clarkson gumikan kay miduwa na kini sa Cavaliers sa National Basketball Association (NBA).

Ug tuod man, nagiyahan ni Blatche ang Team Pilipinas nga molampos sa ilang pagsulong sa Qatar ug Kazakhstan, nga maoy nagpa-qualify kanila alang sa FIBA World Cup.

Human niini, nipadayag pinaagi sa social media si Clarkson sa iyang panghinaot nga makaduwa siya sa Team Pilipinas alang sa FIBA World Cup.

Apan gumikan sa isyu sa iyang Philippine passport, kuli ang poruhan nga makaduwa si Clarkson sa Team Pilipinas alang sa matag upat ka mga tuig nga kompetisyon.

Ang Samahang Basketbol ng Pilipinas (SBP) mipasalig nga ilang buhaton ang tanan nga mahangyo ang FIBA nga molugak kini sa ilang lagda kabahin sa passport aron makaduwa si Clarkson sa Team Pilipinas ug ang laing Fil-foreigners nga sila si Christian Standhardinger ug Stanley Pringle nga adunay sama og isyu ni Clarkson.

Kon magkadungan og duwa sila si Clarkson, Blatche, Standhardinger ug Pringle unya idugang pa ang karaang mga sakop sa Team Pilipinas sama nila ni JuneMar Fajardo, Jasyon Castro, Japeth Aguilar ug uban pa, hayan gituohang dili mabintahaan ang Team Pilipinas sa kampanya niini sa FIBA World Cup. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph