PATAY na nga nahidangat sa tambalanan ang usa ka bata human nga nalumos samtang nagligo-ligo niadtong Miyerkules sa gabii, Disyembre 27, sa usa ka resort sa El Salvador, Misamis Oriental.
Patay nahidangat ang biktima nga si Rafael (bansagon gitago), 8 anyos ug residente sa Zone-4 ning dakbayan.
Sa impormasiyon, gikabutyag nga nangaligo ang biktima kauban ang pamilya niini sa usa ka resort nga nahimutang sa nahisgutang dapit.
Giingong samtang nagligo-ligo, wala na mabantayan kining batang lalaki nga nakapalayo na ug wala na makatunga. Ulahi na nila kining namatikdan ug sa dihang gipangita dako na lamang ang ilang kakurat nga nalumos na kini.
Gani wala pa nakalutaw ang lawas sa bata sa dihang nakita kini sa ilalom nga bahin.
Gisulayan pa kini sa pagluwas sa mga kabanay ug lifeguard apan wala’y swerteng patay na kini nga nahidangat sa pribadong tambalanan sa dakbayan sa Cagayan de Oro.
Sa pagsulat niini nga balita, gi-asikaso na sa nahabiling pamilya ang patay nga lawas sa bata.