GIPAILAWOM karon sa red alert status ang tanang prisohan ilawom sa Bureau of Jail Management and Penology (BJMP) sa tibuok Davao Region.
Kini ang gibutyag ni Jail Inspector Edo Lobenia, tigpamaba sa BJMP-11, atol sa AFP/PNP press conference nga gipahigayon sa The Royal Mandaya Hotel Miyerkules, Pebrero 27.
Sumala niya nga human gipahigayon ang Oplan Galugad sa otoridad sa Davao City Jail sa Barangay Maa, gilayong nagpagawas og kamandoan ang Department of Justice (DOJ) ingon man sa Bureau of Corrections (BuCor).
Giingon sa opisyal nga mokabat 70 porsiyento sa mga personahe sa BJMP-Davao ang gipang-ilisan ug dunay daghan kabag-ohan nga gipatuman.
“Ang gipuli pod nato nga mga personnels gikan sa ubang mga pasilidad sa region,” pagkumpirma ni Lobenia.
Plano sab karon sa BJMP nga ipatuman ang “no contact policy” sa mga dalaw. Buot pasabot nga mag istorya lamang ang piniriso ug dalaw gamit ang telepono nga dunay nakaali sa tunga nga samin.
Tumong sa BJMP nga mapabilin ang luwas nga kahimtang sa mga piniriso ug seguraduhon nga di gayud makasulod ang mga ilegal nga butang labi na ang mga hinagiban og ilegal nga druga.
Gitinguha sa BJMP nga di na masubli ang duguon nga operasyon nga gikamatay sa upat ka mga piniriso ug gikasamad sa tulo ka mga pulis sa Davao City Jail.
Gipaklaro sab sa BJMP nga pasakaan nila og kasong administratibo ang opisyal nga nagpositibo sa paggamit og ilegal nga droga, ug dako ang posibilidad nga matanggal kini sa serbisyo.
Gipasabot sa BJMP nga wala nila ginakonsente ang ilang mga kaubanan, gani duna nay usa sa ilang mga sakop ang natangtang sa serbisyo human nadakpan sa buy-bust operation niadtong milabay nga tuig, samtang laing upat ang nag-atubang karon og kasong administratibo sa ilang buhatan.