DAGHAN na ang nabiktima sa mga textmate. Kining pagsalig sa tawo nga pinaagi lamang sa cellphone nimo naka-ila.

 

Sukad nitumaw kining mga cellphone daghan ang mga kremin nga nahitabo nga naglambigit niini. Dunay mga pamilya nga nagbulag tungod kay ang bana o asawa nagkig-textmate sa laing mga binuhat. Nasapon sa bana o asawa ang mga sweet messages sa cellphone hinungdan sa panagbulag. Dunay nga nag-away tungod kay na wrong sent ang mga text message. Daghan ang mga nangamatay kay giilad sa textmate ug sa panahon nga magkita na gitulis diay o gibuhatan sa dautan.

 

Susama niining nahitabo sa usa ka babaye nga napalgang patay sulod sa usa ka lodging house sa usa ka beach resort ning siyudad.

 

Nakaangkon ang biktima og 23 ka mga samad dinunggaban ug gigulgol pa ang liog. Sa inisyal nga imbestigasyon kauban sa usa ka lalaki ang biktima nga mi-check in sa maong dapit ug dihang ni-abot ang oras sa pag-check out wala na nakagawas.

Dihang gisusi sa roomboy nakita na lang kini nga wala nay kinabuhi. Samtang naghitak sulod sa lawak ang botelya sa ilimnon ug mga upos sa sigarilyo.

 

Sa inisyal nga imbestigasyon, gituohan nga textmate sa biktima ang iyang kauban kinsa wala na sa maong dapit dihang nadiskobre ang hitabo.

 

Kong tinuod man nga textmate sa biktima ang kaubang lalaki nga gituohang maoy responsabli sa hitabo, nabiktima na usab sa textmate kining maong babaye.

 

Ang mga cellphone dako kaayo og tabang sa inadlaw nga gimbuhaton, labi na sa dunay mga negusyo ug mga transaksyon. Tungod sa cellphone dali na kaayo nga mahinabi ang atong mga mahal sa kinabuhi nga tua sa gawas sa nasud nga kaniadto maabtan pa og usa ka semana ang sulat una moabot ug una nimo masayran ang ilang kahimtang. Apan kong ang cellphone gamiton sa dautan ug labaw sa tanan mokalas na og kinabuhi, maka-ingon ta nga maayo pang wala na lang nitumaw kining maong teknolohiya.