NAMALONG tuod ang mga mobile phone service providers sa Metro Cebu atol sa dagkong panagpundok sa publiko panahon sa kapistahan ni Sr. Sto. Niño apan may pipilang bahin nga may koneksyon.
Gipakatap sa “Guardian” ang mga kahimanang intranet niini nga mimugna og mga hotspot, o Wi-Fi access points, alang sa ga emergency responders sa ruta sa Translacion, Fluvial procession ug Sinulog mardi gras.
Gamit ra gihapon sa ilang mga mobile phones, nakahatag pa ang mga miboluntaryo og buhing paghulagway sa social media sa mga kalihukan ug panghitabo.
“Ang katakos nga atong napamatud-an nakapakita sa kaigmat sa Guardian nga makadagan atol, simbako lang, sa mga hilabihang kakulian sama sa mga katalagman nga makapukan sa kuryente ug telekomunikasyon,” mipadayag si Cloyd B. Dedicatoria, tagduma sa SugboTek nga miugmad sa Guardian.
“Pinaagi sa atong mga kahimanan sa komunikasyon, makadagan ang Guardian nga makapahapsay sa operasyon sa emergency responders ug ingon mga sa mga kagamitan ug ekipo human sa dakong linog o makusog nga bagyo,” siya midugang.
Gitumbok ni Dedicatoria nga kadtong mga nanginahanglan, kung may katalagman o panahon sa emerhensiya, makatawag og pakitabang pinaagi sa Guardian “sa usa lang ka toplok sa ilang mobile phones, online man kini o dili.”
Volunteers
Migamit ang Philippine National Police (PNP) Communications and Electronics Service (CES) sa kahimanan sa Guardian uban sa pakig-abag sa Multi Agency Communications Center (MACC) atol sa mga adlaw sa Sinulog 2019 niadtong Enero.
Migamit sab sa Guardian ang mga kahugpongan sa mga emergency responders ubos sa National Civil Defense Network (NCDN) sa ilang pag-coordinate sa mga ginsakopan, ilabi na nga maka-interface ang Guardian sa ilang mga radyo.
sa NCDN ang Radio Emergency Assistance Volunteer Organization (REAVO), nga may kaugalingong Guardian command center, ug ang Foreign-Associated Medical Care (FAMC) Motorcycle Rescue Unit (MRU).
Kaanib sab ang Auxiliary Communicators for Emergency Response (ACER), Central Cebu Fire and Rescue (CCFR), Cebu Road Heroes ug (Yamaha) N-Max Club Cebu.
Bisan kinsa maka-download nga libre sa “Guardian Volunteer” sa ilang Android mobile phones gikan sa Google Play, ug hapit na sab sa AppStore sa mga naggamit og iPhones.
Labaw pa sa kahimanan nga makapakitabang kung may emerhensya, makadawat sab ang mga may Guardian og mga pahibalo kabahin sa kahimtang sa panahon, trapiko ug pagkahunong sa serbisyo tubig ug sugang dagitabnon.
Limana ka mga barangay sa Dakbayan sa Sugbo ug ang Bantay Mandaue may mga command center sa Guardian nga makadawat og mga tawag pakitabang kung may sunog, krimen, emerhensya sa panglawas, ug ubang kakulian; ug makapadala gilayon og mga motubag ug moabag sa maong mga kakulian. (PR)