Wala mi labot sa e-jeep: Mayor Radaza

GIKLARO sa kagamhanan sa dakbayan sa Lapu-Lapu nga wala silay labot sa pagdumala sa mga electronic jeepney (E-Jeep) nga kasamtangan nag-parking sa atubangang bahin sa Lapu-Lapu City Hall.

Hinungdan nga dili usab sila ang adunay tingog o desisyon kun kanus-a kini makadagan sa kadalanan.

Mao kini ang pamahayag ni Lapu-Lapu City Mayor Paz Radaza dihang gikuhaan sa iyang reaksyon ning mantalaan kalabot sa nanggawas nga mga estorya nga posibleng giangan-angan ang pagpadagan sa mga E-Jeep aron gamiton sa pamolitika.

Matod ni Radaza nga bugtong ang papel sa City Government sa mga E-Jeep mao ang pag-abag sa tricycle drivers nga sakop sa United Drivers Operators and Transport Cooperative UDOTCO nga mapahimutang kini.

Sama na lang sa pagpagamit una sa luna atubangan sa city hall samtang wala pa mahuman ang terminal ug charging station nga gitagana alang sa maong mga sakyanan nga gipanag-iya sa usa ka mall sa Barangay Pusok apan libreng ipagamit gumikan sa usufruct agreement tali sa dakbayan ug mall.

Dili usab pagbuot sa kagamhanan ang pagbutang og mga E-Jeep sa dakbayan kun dili tipik ug kabahin kini sa transportation modernization program ni Presidente Rodridgo Duterte hinungdan nga dili mahitabong ang dakbayan maoy adunay katungod sa naasoyng mga sakyanan.

Ang mayor naglaom nga modagan na ang naasoyng mga E-Jeep aron usab dili kini kanunay mag estambay sa atubangan sa City Hall diin magtuo na hinuon ang katawhan nga iya sa kagamhanan ang naasoyng mga sakyanan.

“Sa pagpinirmahay, ila gyud na (Udotco) gitabangan lang nato nga maadto ang Star 8 (manufacturer sa E-Jeep), maadto nila ang Boracay, maadto nila ang Tacloban to see how effective ug unsa ang mga proseso nga himuon in-ana lang ato tabang” pagpasabot ni Radaza. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph