Tag-iya, mga trabahante sa piggery gikiha

TAG-iya sa baboyan nga gironda sa National Bureau of Investigation (NBI) sa lungsod sa San Fernando, lakip na ang tulo niya ka mga trabahante, gipasakaan na og tukmang reklamo ngadto sa piskaliya.

Kini tungod sa operasyon sa ilang baboyan, diin ang hugaw gikan sa pasilidad, direkta nilang gilabay sa kadagatan.

Giduso sa NBI Environmental Crime Division ngadto sa Cebu Provincial Prosecutor’s Office ang mga kasong kalapasan sa Sec. 107 sa Philippine Fisheries Code ug sa Clean Water Act batok sa upat nila ka mga dinakpan atol sa ilang pag-serve ug search warrant sa usa ka baboyan sa Barangay Sangat, San Fernando, Cebu.

Ang mga gipasakaan ug kaso mao ang tag-iya nga si Santiago Tanchan III ug ang iyang mga sakop nga silang Rosalio Aguanta, Jayson Fritz Aguanta ug Jeramil Sabala, nga pulos naabtan sa operating team nga naglabay og hugaw sa mga baboy ngadto sa kadagatan.

Matod sa labaw sa NBI-ECD nga si Atty. Czar Eric Noqui, untreated waste gikan sa baboyan ang gilabay direkta sa dagat agi sa mga tubo nga gimuntar sa kompaniya.

Ang Multifarms Agro-Industrial Development Corp. gironda sa NBI, Bureau of Fisheries and Aquatic Resources (BFAR), Philippine Coast Guard (PCG) ug Department of Public Works and Highways (DPWH), pinasikad sa duha ka search warrants gikan sa Cebu City RTC Branch 24.

“... This corporation is involved in dumping of waste, untreated waste to the municipal waters of San Fernando and that they are dumping these wastes without the necessary permits from regulating agency, particularly from the DENR-EMB and the Bureau of Fisheries and Aquatic Resources,” tipik sa pahayag ni Noqui.

Kompiyansa ang NBI nga masang-at usab sa korte ang mga kaso batok sa mga dinakpan. Kini bisan og mahimo silang makapiyansa niini.

Gipadayag ni Noqui nga taas ang silot sa kaso kun ugaling mapamatud-an sila nga sad-an.

Bisan ug makapiyansa pa sila, kompiyansa ang NBI nga dili na sila makabalik sa ilang operasyon, ilabi na sa pag-dispose ug hugaw paingon sa dagat kay giputol na man ang mga gisumpay-sumpay nga tubo nga maoy gigamit nila niini.

“Yung pipeline leading to the sea, subject ito ng search warrant kung kaya’t ito’y ating pinutol at tinanggal natin. So safe to say, hindi na makakapag–discharge sa dagat itong korporasyon na ito,” niingon si Noqui.

Nagdumili pagkomentaryo ang mga dinakpan labot sa pagpasaka na og mga kaso batok kanila ug nagpaabot una sila nga pormal nga makadawat og kopya o maesplikahan sa ilang abogado bahin niini.

Padayon gihapon ang operasyon sa Multifarms Agro-Industrial Development Corp. bisan pa sa gipahigayon nga pagdakop sa tag-iya niini Martes, Pebrero 26.

Usa ka search warrant ang gi serve sa hiniusang operasyon sa National Bureau of Investigation, Environmental Management Bureau, Philippine Coast Guard ug Department of Public Works and Highways.

Atol sa search, nasaksihan sa awtoridad ang paglabay sa hugaw sa baboyan sa dagat.

Gipanghingusgan ni Joey Abarquez, 34, usa ka trabahador sa maong kompaniya, nga limpyo na ang tubig nga ilahang ipagawas sa dagat. Iyaha sab gipasabot ang pamaagi niini.

Matod ni Abarquez, ang kinolekta nga hugaw sa mga baboy ibutang sa biogas chamber kon asa kolektahon ang gas gikan niini. (AZLG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph