Di kumbinsido si Lapu-Lapu City Mayor Paz Radaza sa hulagway nga giingong gituboy ni Presidente Rodrigo Duterte sila si Pajo Barangay Kapitan Junard “Ahong” Chan pagka-mayor ug ang iyang running mate nga si Dr. Celedonio SItoy, pulos mga kandidato sa PDP Laban.
Si Mayor Radaza nagpapili pagka-kongresista sa Lapu-Lapu samtang ang iyang bana nga si Arturo, modagan pagka-mayor ubos sa Lakas CMD atbang ni Chan.
Kasaligang tinubdan sa Malacañang, kinsa nagdumili sa pagpaila, nipasabot sa protocol nga gisubay sa Presidential Management Staff (PMS) ug Presidential Security Group (PSG) nga kadtong mga kandidato nga nakasaka sa stage mao ray adunay clearance base sa lista sa mga imbitado.
Samtang ang diha sa ubos sa entablado nagpahulagway, posible nga agi og kurtesiya susama sa pasabot ni Presidential Spokesperson Salvador Panelo, , ilabi na kon nga adunay kuyog nga padrino nga suod sa Presidente hinungdan nga wa makabalibad si Duterte.
Gihulagway ni Radaza nga nagpa-selfie lang sila si Chan uban sa Presidente atol sa campaign rally niadtong Pebrero 24 sa Plaza Independencia, sa Siyudad sa Sugbo.
“As you can see sa ilang pag-isa sa kamot, maklaro man nimo kon giisa ba or ikaw ang nag-isa,” matod ni Radaza atol sa press conference kagahapon, Pebrero 27.
Iya sab nga gikuwestiyon nga didto sa kakahoyan ang pag-isa sa kamot inay sa naandan nga ibabaw sa entablado susama sa gihimo ni Duterte nila ni Cong. Gwen Garcia ug sa grupo ni Cebu City Vice Mayor Edgardo Labella.
Si Chan sa iyang naunang mensahe, niiingon nga ang reaction sa iyang kaatbang timaan lang nga nangaratol na.
Giklaro sa kapitan nga base sa hulagway nga wa ibabaw sa entablado gihimo ang pagtuboy ni Duterte kaniya, kay gikapoy na ang Presidente sud sa upat ka oras niining nga kalihokan.
“Way makadiktar sa Presidente nga i-isa ang akong kamot, kagustohan to ni Duterte. Bisan pa didto mi sa kakahoyan (Plaza Independencia),” saysay ni Chan.