MALAMPUSON nga natapos ang kasaulugan sa ika-15 nga katuigan sa Barangqay Buhangin Proper niadtong Huwebes.

Sa maong adlaw, gihimo ang halapad nga parada kun diin nagkadaiyang sektor, grupo sa barangay lakip na mga barangay opisyal, functionaries ug uban pa, madasigon nga misalmot.

Luyo niini, mapasalamaton sab si barangay kapitan Jimmy Salvador tungod sa ubay-ubay ka mga bisita, lokal nga opisyal nga nakigduyog sa ilang kasaulugan.

Giatangan atol sa parada ang indigay sa mga nindot nga floats nga gisalmutan sa matag purok sa barangay.

Matag purok mipakita sa ilang abilidad sa pagbutang og dekorasyon sa mga floats nga misalmut. Napiling mananaug, gihatagan sab sa dagkong ganting salapi.

Human sa parada, nagtapok ang mga bisita, katawhan sa lugar sa barangay gym aron nga mosaksi sa programa nga gi-andam.

Luyo sa maong aktibidad, Miyerkules sa gabii, napuno sa hudyaka, palakpakan, kahinam ang lugar samtang gihimo ang indigay sa Mutya ng Barangay Buhangin 2010.

Ang kinse ka mga maanyag nga dalaga gikan sa nagkadaiyang bahin ning siyudad, nagiya-iya sa pagrampa, mipakita sa ilang kamaayo ibabaw sa entablado.

Katawhan nga misaksi sa kalihukan, may kaugalingon sab nga kandidatang gisuportahan, padayon sa pagpalakpak isip paghatag og kadasig sa ilang napiling kandidata.

Nahimong malampuson ang pagpahigayon sa Mutya ng Barangay Buhangin 2010 tungod sab sa ubay-ubay ka mga isponsors nga mihatag og suporta sa kalihukan.

(Sunstar Superbalita Reader's Choice Award)

Atol sa indigay, pormal sab nga gipili ang labing una nga Sunstar Superbalita Reader's Choice Awards. Sa pipila ka semana sa wala pa sugdi ang kompetisyon, mga kandidata tagsa-tagsa nga gipatik ning mantalaan aron mahatagan og higayon nga sila ma-feature, mapili sa mga magbabasa alang sa maong pasidungog.

Mga magbabasa mo-fill up sa kupon nga nakabutang dinhi, lakip na ang pagboto nila sa kandidata nga ilang napilian.

Sa kinse ka mga kandidata, mibandera gyud si Lyra Mae Samontina, magtutungha sa University of Southeastern Philippines, human niya nakuha ang pinakadaghang boto alang sa maong pasidungog.

Huwebes sa hapon, gihimo ang pag-ihap sa mga boto uban ang mga reprsentante sa Sunstar Publishing nga sila Leo Ocot, Jeffrey Romero, Bryan Dimayuga, Redentor Bitanga, DTI representative, mga representante gikan sa barangay.

Luyo kang Samontina may duha sab ka entry senders nga gibunot ni Tessie Pa¤a, Sunstar General Manager nga midaug og grocery items.

(Ubang mananaug)

Gihatag sab ang mga special prizes. Ang Best in Playsuit ug Coca-cola Body nalabni ni Jamaica V. Mendoza. Giila sab nga Ms. Boardwalk si Teresita dela Cruz. Malipayon sab nga gidawat ni Ann Claudine Andres ang Ms. RDL Surewhite.

Napili sab nga Ms. Honda Prestige si Augie Sagarino. Gibitbit usab ni Suzie Brown ang Ms. San Miguel, Best in Evening Gown ug Casual Attire. Samtang napili

nga Ms. Fantasy mao si Khamila A. Galido.

(Gi-koronahan)

Human ang kulba-hinam nga question and answer portion gipili na sab ang mga mananaug sa indigay. Tungang gabii na, apan buhi gihapon ang tibuok Buhangin Gym sa mga tawong puno gihapon sa enehiya sa paghatag og suporta sa ilang tagsa-tagsa ka kandidata. Mga hurado, gilangkuban sa mga inilang modelo, title-holder sa natad sa beauty pageant.

Napili nga 3rd runner-up ang magtutudlo nga si Emelene C. Gamayon. Mi-puwesto isip 2nd runner-up ang taga-Panacan nga si Teresita dela Cruz. First runner-up sab si Suzie Brown, estudyante sa Womens College of Davao.

Tumang kalipay sab ang gibati ni Jamaica Omega V. Mendoza, estudyante sa Mindanao Kokusai Daigaku human siya gikoronahan nga Mutya ng Barangay Buhangin 2010.

Ang kapin semana nga kalihukan sa barangay, nahuman nga mabulukon, malampuson tungod sab sa aktibong partisipasyon sa tanan, gikan mga barangay opisyal, functionaries, SK Council, katawhan sa lugar.