KAMATAYON ang gidangatan sa usa ka 30-anyos nga lalaki human siya gipusil sa ulo sa iyang gikalalis samtang didto sila sa usa ka tindahan sa Sitio Balabag-Tudaya, Barangay Sibulan, lungsod sa Sta. Cruz, Davao del Sur.

Biktima nailhan nga si alyas Tata Sungkog, ug molupyo sa Barangay Kapatagan, siyudad sa Digos.

Nahitabo ang maduguong insidente alas 4:40 sa hapon, Huwebes.

Kapulisan sa Sta. Cruz nagkanayon nga subay sa ilang inisyal nga imbestigasyon nga sa wa nahitabo ang insidente, didto ang biktima sa usa ka tindahan ug gikalalis niini ang suspek nga si Roland Rakman, 38 anyos, kinsa kauban niyang nag-atiman og pananom nga mga gulay didto sa Kapatagan.

Hinuon, wa pa masayri kun unsay ugat sa ilang bingkil.

Mga nakakita sa krimen nagsulti sa kapulisan nga wa lang dangti og pila ka gutlo kalit lang nga nihulbot si Rakman sa armas nga gitakin sa iyang hawak ug didto gipusil ang biktima direkta sa ulong bahin.

Biktima, nahagba sa yuta ug wa na matabang.

Ang suspek, human sa hitabo, tulin sab nga misibat palayo sa lugar ug padayon kining gipangita sa kapulisan.

Si Polcie Officer 2 Elmer Banagaso, imbestigador sa kaso nagsulti nga buot nilang ipailawom sa otopsiya ang patay'ng lawas sa biktima aron himuong ebidensya ang resulta sa pagduso nila og kaso.

Namatikdan nga bisan og hugot ang implementasyon sa election gun ban makahimo gihapon paglusot sa Joint Security and Control Center checkpoint ang mga tawong nagbaton og armas. (Dondon Dinoy)