GIPRISO sa kapulisan ang duha ka lalaki kinsa nag-atubang og orden de aresto gumikan sa kasong pagpangawat didto sa lungsod sa Hagonoy, Davao del Sur.
Gidakop nila ni Senior Police Officer 1 Raul Dela Cuadra ang mag-agaw nga sila si Raylan Lim ug Jetrone Manuel, mga ulitawo ug pulos 18 anyos nga mga molupyo sa Sitio Bodoy, Barangay Guihing, sa lugar.
Nasiplatan sa kapulisan ang mga suspek mga alas 11 sa buntag, Huwebes dihang didto kini sa lugar.
Daling gibitbit sa kapulisan ang warrant of arrest nga gipagula ni Executive Judge Carmelita Sarno-Davin sa Regional Trial Court Branch 11 ug Branch 18 sa dakbayan sa Digos.
Ang kaso sa duha nakadoket sa criminal case number FC-153-09.
Ang duha temporaryo nga makaguwa gikan sa bilangguan kun makabayad sa piyansa nga P12 mil matag usa.
Gilauman nga pahibaw-on na sab sa kapulisan ang korte nga nasignit na nila ang duha aron sugdan na ang pagtaral sa ilang kaso. (Dondon Dinoy)