ANG publiko gipahimangnuan diha sa pagsakay sa mga habal-habal kay adunay mga driver nga sideline lang ang pag-habal habal apan ang tinguha diay ang mangita og mabiktima sa tulis o snatching.
Samtang kapulisan usab ang nitutok batok sa maong mga modus.
Kini human nga usa ka giila nga notado nga tulisan ug giingon nga sakop sa Kuratong baleleng gang nga si Gerry Escoto Erana, 50 anyos, lumad nga taga Quezon, Bukidnon, ang nasikop atol sa follow-up operation niadtong Martes, Pebrero 27, sa gabii sa lungsod sa Consolacion.
Kini human nga pipila ka higayon kini nga maoy gi-describe ug gitudlo sa mga nabiktima sa tulis o snatching dili lang sa dakbayan sa Mandaue, apan lakip na sa lungsod sa Consolacion, ug bisan sa Liloan.
Gitug-an ni Mandaue City Police Office director, Senior Supt. Julian Entoma, nga sa ulahi nga nabiktima ni Erana, nahitabo niadtong Martes sa kaadlawon sa barangay Pagsabungan, diin usa ka negosyante ang gitulis.
Lakip sa nakuha sa biktima ang Iphone nga cellphone niini, apan na-trace sa mga pulis nga atua sa barangay Lusaran, sa dakbayan sa Sugbo.
Atol sa gihimo sa dugang nga pakisusi, gitudlo nga gikan kang Erana ang cellphone, ug nanugo kini sa pagbaligya sa cellular phone.
Atol sa pagkasikop kang Erana, nakuha ang usa ka 38 revolver nga adunay mga bala, hand grenade, unom ka mga nagkadaiyang cellphones, mga cellular phone charger, mga identification cards, kwentas, mga nagkadaiyang pitaka ug bag, nga adunay mga nagkadaiya usab nga atm cards, nga gidudahan nga iya sa iyang mga nabiktima.
Gitug-an ni Entoma nga sukad 2000 pa kini nga pinangita sa Region 7, apan magbalhinbalhin sa mga lugar sa Kabisay-an, Mindanao ug sa Luzon.
Nasuta usab nga aduna usab kini duha ka dagko nga kaso nga robbery sa Cavite.
Matud ni Entoma nga lakip kini sa grupo nga gitumbok nga maoy suspetsado sa pagpanulis sa Palawan pawnshop sa lungsod sa Liloan sa niaging bulan, ug sa distributor og Avon products sa Consolacion niadtong Disyembre.
Dugang ni Entoma nga ang maong grupo kauban ra sa uban nga mamaligyay og illegal nga drugas, apan sila usab ang gigamit aron sa paglipat sa kapulisan ug sa publiko diha sa kampanya batok drugas.
Gawas sa grupo ni Erana sa Kuratong, giingon nga anaa usab kini laing lokal nga grupo sa mga tulis, snatching ug laing klase pa sa kawat.
Dugang ni Entoma nga nabantayan na nga kon magpadulong ang eleksyon mao usab kasagaran gyud sa pagsiaw sa maong grupo sa tulisan.
Hinungdan nga gawas sa gihimo sa mga pulis nga pamaagi sa pagpuhag sa maong grupo, giawhag usab ang publiko nga mas magbinantayon.
“Dugay na nato ni siya nga gipangita. Notado na gyud ni siya nga tulisan, sa grupo ni siya sa Kuratong, siya ang anaa sa linya sa mga tulisan. Ato ni nakita nga nidaghan ni sila og pang-igo mapa ginagmay nga pagtulis, kini aron nga paglibog sa kapulisan, pagkuha sa atensyon sa mga pulis ug sa public, sa grabe nga kampanya batok drugas. Ato nabantayan nga mosiaw gyud pud ni sila panahon nga magpadulong ang eleksyon, nagkinahanglan ni og kwarta mao na pinaagi sa drugas ug tulis,” gitug-an ni Entoma.