Sugilanon: Apostoles

Sugilanon: Apostoles

UNSAY giduol adtong tawhana nimo, Delphia?” matod ni Lola Phila sa iyang apo nga naghuwat kaniya samtang naglingkod sa sementadong lingkuranan sa may mantalisayan. Nasiklapan niya ganina si Delphia nga giduol ni Kago samtang nakighalubilo pa siya sa iyang mga kaubang lektor sa simbahan pagkahuman sa unang misa sa benlita sa lukay. Ilang gi-estoryahan ang mga aktibidades nila sa umaabot nga Semana Santa.

“Nangutana ra, La, unsay ngan nako. Karon pa man god kuno siya kakita nako dinhing dapita,” tubag ni Delphia, nga karon pa nakabakasyon dinhi sa lugar sa iyang Lola sa probinsiya.

“Palay-i tong tawhana, Delphia, ha? Kon moduol siya nimo, lakaw dayon bisag naa pa siya sa 100 meters gikan nimo,” ni Lola Phila nga mikagot ang bag-ang.

“Grabe si Lola!” nahikatawa si Delphia. “Ngano man, La? Unsa may sala niya nimo?”

“Apostoles to siya,” tubag ni Lola Phila. Gihunongan sila sa usa ka traysikol kay namasahero ang drayber.

“Palay-an kay apostoles? Ngano man kuno? Pari nuon, kay di pweding magminyo. Lola, uy, makalibog man!” bagulbol ni Delphia dihang misakay sa traysikol.

“Unsay gibagulbol nimo, diha?” ni Lola Phila.

“Wa, La, uy! Nag-praktis ra kog ‘beat box.’ butbot ni Delphia nga nagngisi. Gipalarga sa drayber ang traysikol.

TOK! TOK! TOK! Mituktok si Lola Phila sa pultahan sa lawak ni Delphia.

“Delphia, mata na diha! Aron manilhig na sa tugkaran! Manglimpyo sa balay!” singgaak ni Lola Phila.

“Sayuha pong mamukaw ni Lola, uy! Alas singko pa gani sa kaadlawon,” hagawhaw ni Delphia human matan-aw ang alarm clock sa iyang kuwarto. Mibangon siya.

“Kinsa may moabot nga bisita, La, nga manglimpyo man ta sa tugkaran ug sud sa balay?” ni Delphia nga gaduka pa paghiguwa niya sa iyang kuwarto. Nanglugod siya sa iyang mga mata.

“Suroy ron sa mga apostoles sa atong dapit. Mamenlita sila sa kabalayan,” ni Lola Phila nga naglimpiyo sa altar sa sala ug namutang og mga buwak.

Dali nga nanglabay ang mga takna.

“Delphia, dagkuti na ang mga kandila sa altar. Miabot na ang mga apostoles!” ni Lola Phila sa mahimut-on nga tingog.

“Oo, La!” ni Delphia.

Nag-ampo ang mga apostoles sa ganghaan sa ilang balay. Nagsul-ob silag sinina nga panahon pa ni Kristo ang estayl. Unya misulod ug namenlita uban ang pag-awit sa ‘Diyos namo sa kaluoy...’ Ug unya nag-ampo sila atubangan sa altar. Pagkahuman nakita ni Delphia nga malipayon kaayong nakigkabildo ang iyang Lola sa mga apostoles nunot ang pagtunol sa halad nga kuwarta. Miagda pa kini, “Pangaon sa mo, Dong!”

“Busog pa kaayo mi, La. Bag-o pa mi namahaw sa kumbento. Ari na mi.” Ug nanggawas ang mga apostoles sa ilang balay.

“Maayo man lagi ka mitagad sa adtong mga apostoles, La?” ni Delphia nga nahibulong.

“Aw, mga apostoles man to sa Ginuo!” daling tubag ni Lola Phila.

“Unya, nganong suko man kang Kago, nga apostoles man pod kaha to?” ni Delphia.

“Lahi man tong iya nga pagka apostoles. Kita bitaw ka, wa siya mokuyog adtong dose ka apostoles ganina!” ni Lola Phila.

“Unsa man diay nga pagka apostoles ni Kago, La?” ni Delphia.

“Apo’s tulis-san man to!” ni Lola Phila.

“Nagpakatawa si Lola,” mingisi si Delphia.

“Tuo gyud nako, Delphia. Palay-i gyud na si Kago. Naibog ra ba to nimo sa tan-aw ko. Kon di ka motuo...kaguol, kagubot ra gyuy makuha nimong Kago!” Nangugat si Lola Phila. Mihilom na lang si Delphia. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph