KIDAPAWAN CITY -- Walay presensiya sa mga langyaw nga terorista sa Soccsksargen, gikompirma ni Police Lieutenant Colonel Aldrin Gonzales, tigpamaba sa Police Regional Office 12.
Apan giklaro niini nga dunay mga indikasyon sa mga tagasuporta (sympathizers) gumikan sa mga bandila sa Islamic State of Iraq and Syria (Isis) nga narekober sa operasyon sa militar ug kapulisan sa mga probinsiya sa South Cotabato, Sarangani ug Sultan Kudarat.
Apan giklaro sab niya nga andam ang PRO-Soccsksargen kung ugaling makasulod sa rehiyon ang mga foreign terrorist susama sa Isis.
Apil sa gibantayan sa mga awtoridad mao ang Bangsamoro Islamic Freedom Fighters (BIFF), New People’s Army (NPA) ug uban pang mga armadong pundok.
Samtang giklaro sab ni Gonzales nga dili kompirmado ang taho sa recruitment activity sa mga Isis sympathizers sa mga kabataan sa probinsiya sa North Cotabato.
Gipakusgan nila karon ang security measures, intelligence monitoring ug checkpoint operation aron mapugngan ang bisan unsang hulga sa seguridad sa katawhan sa Soccsksargen. (Edgar E. Fuerzas)