NASIGNIT sa mga otoridad ang duha ka mga karnaper atol sa ilang gilusad nga operasyon didto sa Cotabato.

Mga dinakpan giila nga sila si Dennis Ulangkaya ug Tong Andang, ug pulos molupyo sa Datu Piang, Maguindanao.

Matud sa taho gikan sa Cotabato Police Provincial Office, alas 2:00 sa hapon, Pebrero 18, nga milusad og operasyon ang mga ginsakpan sa Anti-Carnapping Team nga gipangulohan ni Senior Inspector Elias Dandan sa barangay Inug-og, Pikit.

Didto ilang nasiplatan ang mga suspek nga sakay sa usa ka XRM nga motorsiklo.

Dihang gisita sila sa kapulisan nakuha gikan sa ilang posisyon ang usa ka kalibre .45 nga pistola, magnum 357 rebolber, usa ka granada, ug mga bala.

Dihang gisusi sab ang ilang gisakyang motorsiklo didto nakumpirma nga kinawat kini didto sa Midsayap.

Ang duha nagtingkagol na karon sa selda samtang gipasang-at na batok nila ang kasong illegal possession of firearms and explosives, apil na ang carnapping.

Gumikan sa pagtaas sa gidaghanon sa mga gipangkawat nga motorsiklo gitahasan ni Cotabato Governor Jesus Sacdalan ang kapulisan nga tutukan pag-ayo ang ilang operasyon batok sa mga tawong nalambigit sa organisadong grupo sa mga carnappers nga naglihuk lamang sa lugar. (Edgardo Fuerzas)