SUPERBALITA CEBU

Super Suroy: Ang kagahapon sa Las Casas

DILI sa tanang panahon magpabilin ka sa lugar nga imong gipuy-an sanglit adunay higayon nga ikaw padparon sa laing dapit bisan daklit lang.

Kon ikaw masuroy sa Luzon area ilakip sa inyong itinerary ang Las Casas Filipinas de Acusar (LCFDA) heritage resort sa lungsod sa Bagac, lalawigan sa Bataan nga naila nga world-class historical haven sa nasud.

Ang maong dapit nahimutang 1,018 kilometro gikan sa dakbayan sa Sugbo.

Sa pag-abot sa LCFDA mangangha ka sa desenyo nga na-uso kaniadto panahon sa mga Katsila gumikan sa classic architecture sa ilang struktura ug grandioso nga landscape.

Ang Las Casas nagbinugtong nga hotel sa nasud nga nakadawat og mga international nga pasidungog sama nalang sa award nga Asia’s most excellent destination niadtong tuig 2017 ug nalakip sa talaan sa international travel magazines sama sa Conde Nast Johansens Luxury Globla Collection ug Hotels Pencities Luxe Guide.

Ginganlan kini og LCFDA sanglit si Jose Acusar maoy nagpabarog sa maong Spanish-era mansions niadtong tuig 2003.

Niadtong tuig 2010, giablihan sa publiko diin ang 27 ka stone house o balay na bato nga nahimutang sud sa 400 ektarya nga luna.

Ang labing nindot sa 27 ka mansion nga gitawag usab og open air museum mao ang Hotel de Oriente.

HERITAGE TOUR

Alang niadtong buot mosuroy adunay tulo ka package tour nga inyong kapili-an nga haom sa inyong budget.

Regular weekday tour – gikan sa Lunes ngadto sa Huwebes sa P1,500 matag guest ug inclusions niini walking heritage tour uban sa tour guide, free na nga bottled water o welcome drink, makagamit sa ilang rain coat kon maatlan nga uwanon, cold towels, hatagan og mapa ug beach access.

Regular weekend tour – sa Biyernes, P1,850 per person diin susama og inclusion sa weekday tour apan adunay balsa cruise or dining credit, calesa (tartanilla) ride ug access sa Hotel de Oriente.

Full weekend heritage tour – Sabado ug Dominggo nga mokabat sa P2,500 diin matagamtaman ang susamang inclusions sa Friday tour ug adunay P500 worth nga dining credits.

Nagtanyag sab ang Las Casas sa ilang Balsa tour nga motuyok sa ilang property sanglit daplin ra usab kini sa dagat.

Ang Balsa tour nagkantidad og P300 sa buwan sa Hulyo hangtod Oktubre, samtang P500 gikan Nobyembre hangtod Hunyo diin mahimo nang mosakay sugod 9:00 sa buntag ug ang night hour magsugod 6:00 sa gabiin ngadto na sa 8:00 sa gabii.

Ang Hotel de Oriente maoy giila nga first luxury hotel sa Pilipinas diin imong masinati o masuta ang kinabuhi sa mga Filipino nga nasakop sa alta de ciudad kon mga adunahan panahon sa Espanyol.

UNSAON PAG-ADTO?

Kon gikan ka sa Cebu via airline nga motugpa sa Clark International Airport, Pampanga o Ninoy Aquino International Airport, Pasay City, Metro Manila.

Gikan sa Cubao, Quezon City, sakay ka og bus nga adunay P200-P250 matag pasahero nga plete ug maabot ka sa Balanga, ang capital city sa Bataan labing dugay duha ka oras ug tunga.

Manukad sa Bataan terminal, sakay ka og bus paingon sa Bagac sa pletehan nga P50 sa usa ka oras nga biyahe.

Gikan sa town proper sakay sa tricycle sa tag-P10 ang plete paingon sa LCFDA.

Kon gikan kas Manila sakay sa private car, molanat og 3 ka oras imong biyahe agi sa NLEX.

Adunay P157 nga toll fee inig gawas paingon San Fernando agi sa Jose Abad Santos Avenue paingon sa Bacoor, Giagua, Lubao sa Pampanga hangtod sa Bataan ug subaya ang mga signage.

Ang management sa LCFDA naglaraw nga ilang pun-an aron mahimong 50 ka mga mansion ug aron daghang kasuroyan ingon man matagbaw pag-ayo ang mga lokal ug langyaw nga turista.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph