MASALIGON ang Sugboanong skateboarder nga si Margielyn Didal nga maka-gold sa umaabot nga 2019 Southeast Asian Games nga ipahigayon dinhi sa nasod karong bulan sa November.
Atol sa gipahigayon Philippine Sportwriters Association (PSA) Awards Night sa Manila Hotel siya mipadayag sa mga tigbalita og siyento por siyento nga kalampusan.
Si Didal nalakip sa pipila ka mga nag-unang atleta sa nasod nga gipasidunggan sa PSA diin siya ang nahimong Athlete of the Year awardee.
Ang Skateboarding gilakip na karon sa SEA Games, usa ka tuig human si Didal nakahatag sa unang gold medal sa Asian Games sa women’s street event.
Kining maong event, sa unang higayon, iapil na usab sa 2020 Tokyo Olympics nga salmotan usab ni Didal.
Apan sa dili pa siya mo qualify sa Olympics, kinahanglan una nga makatigom siya og igong mga puntos sa mga qualifying tournaments nga ipahigayon sa pipila ka mga nasod.
“Gusto ko mag-qualify sa Olympics. More on focus tayo sa SEA Games dito sa Manila pero more on goal natin is Olympics,” matod ni Didal nga nakutloan sa Spin.ph.
Ang lumad nga taga barangay Lahug, dakbayan sa Sugbo gikatakda nga mosalmot sa London event karong Mayo nga maoy usa sa mga tipik aron pag-qualify sa Olympics.
Sa niaging tuig, misalmot usab sila sa qualifying event sa Rio De Janiero diin siya nahiluna sa ika-14 nga puwesto. (JBM)