GIPUKAN sa Cebu City team ang La Carlota, 25-22. 25-17, sa semifinals round sa 2019 Batang Pinoy Visayas boys volleyball kagahapon nga gipahigayon sa Central Philippines University gym.
Ang kadaugan naghatag kanila og kasiguroan nga makaabante sa Batang Pinoy National Finals diin ang top three sa Visayas qualifier maoy madala.
Apan bisan pa niini, hugot gihapon ang tinguha sa Cebu nga maangkon ang kampiyonato sa regional competiton aron ilang mabawi ang ilang kapildihan sa championship match sa niaging tuig batok sa Antique nga gipahigayon didto sa Dumaguete.
“Among tuyo mao gyud ang gold medal para sa among pamilya. Bisan og wala sila diri, gusto namo ang kalampusan nga makauli nga may dalang gold medal,” matod sa team captain nga si Isaiah Jehu Gabut. (RSC, JBM)