GIISA ni Presidente Rodrigo Duterte ang kamot sa mga kandidato nga sakop sa Barug PDP–Laban sa Cebu City ug ang sa One Cebu-PDP Laban sa Cebu province didto sa Plaza Independencia niadtong Pebrero 24 sa gabii. Unsa man kahay mahitabo human niadto? Bisan tuod og nakahatag kadto og pogi points sa mga kandidato apan dili kini garantiya nga sila na ang pili-on sa mga botante. Tinuod nga makadani og botos ang pagka-popular ni Presidente Duterte apan nagtuo ako nga hashasan gihapon sa mga botante ang mga kandidato.
Wala pa mahunong kining vote-buying panahon sa kampanya ug sa adlaw sa eleksiyon mismo. Ang nakapabor niini niadtong miaging piniliay mao ang mga kandidato sa administrasyon kay gibantayan ug gi-imbargo man sa kapulisan ang kwarta sa oposisyon nga gamiton unta sa pagpamalit og botos. Muminos na tingali ang terorismo ug pagpanghulga sa mga dagkong siyudad apan nagpaabot ako nga magpadayon gihapon kini sa kalungsuran labi na sa mga dapit diin ang mga pulitiko mga warlords.
Dinhi sa dakbayan sa Sugbo tingali og milig-on ang kandidatura ni Vice Mayor Edgar Labella nga midagan sa pagka-mayor. Apan neck-and-neck gihapon ang away tali nila ni Mayor Tomas Osmeña. Nagkinahanglan si Labella og hugot nga pagduso ni Duterte labi na karon nga wala na nganli ug sawaya sa presidente si Mayor Osmeña. Ang pag-isa sa kamut ni kanhi mayor Mike Rama nga karon kandidato sa pagka-bise mayor nga giisa ang kamut ni Presidente Duterte gipakaminus ug gisaway sa iyang mga kaatbang. Sa lalawigan sa Sugbo dili na malalis kinsay suportahan ni Presidente Duterte pagka-gobernador. Giisa sa pangulo ang kamut ni Kongresista Gwen Garcia ug nagpasalamat pa gayud si Duterte sa panabang nga gihatag sa mga Garcia niadtong milabay nga presidential election nga nakakuha og dakung mayoriya ang presidente. Bisan og gibaliwa kini ni Vice Governor Agnes Magpale, nga modagan pagka-gobernador, apan nasayud siya nga dako kadtong pabor alang kang Kong. Garcia. Apan daghan pang mahitabo kay layo pa kaayo ang Mayo 13 nga eleksiyon.
•••
Gisirhan na ang piggery kun dakung baboyan sa Sitio Magtalisay, Barangay Sangat, San Fernando, Cebu niadtong Pebrero 26. Ang piggery nga Multifarms Agro-Industrial Development Corp. gipanag-iya ni Santiago Tanchan III. Gidakop sa National Bureau of Investigation (NBI)7 si Tanchan, ang maintenance officers Jayson Fritz Aguana ug Jeramil Sabala ug ang manager nga si Rosalio Aguanta. Ang Multifarms pamultahon og P14.5 milyones sud sa 15 ka adlaw samtang pasakaan og sumbong ang mga dinakpan. Dugay na kining problema diha sa maong dapit. Gitawag na gani kini og Barangay Baho tungod kay ang hugaw sa dili mominus 10,000 nga baboy idiritso lang og labay sa dagat pinaagi sa drainage system. Ambot og nganong wala kini mahunong sa mga opisyal sa barangay ug munisipyo maong dapit? (mannyrabacal1144@gmail.com)