DAGHAN sa ordinaryong mga tawo, labina ang kababayen-an, labi na mga inahan, nangalipay sa pagpirma na ni Presidente Rodrigo Duterte sa expanded maternity leave. Inay nga 60 lang ka adlaw ang daan nga maternity leave, gilugwayan kini ngadto sa 105.
Mahimo kini i-extend og 30 ka adlaw nga way bayad ug alang sa mga solo nga inahan, madugangan kini og 15 ka mga adlaw.
Maanindot tuod kay ikauban og igo-igong panahon sa mga masuso ang ilang mga inahan, labina sa nag-unang tulo ka mga buwan. Duna say igong panahon ang mga bag-ong nanganak sa pagpahuway sa taas nga panahon.
Apan angay usab nga bantayan ang di maayong epekto ning mao nga balaud ngadto sa kababayen-an. Hayan, magmugna na hinuon kini og kahadlok sa mga employer sa pagkuha og mga babayeng trabahante.
Bitaw, kinsa may ganahan nga negusyante nga mokuha og trabahante nga sa ngadto ngadto, mahanaw og taas nga panahon sa trabaho. Dako baya kini og epekto sa produksyon sa kompaniya, labina kon ang usa ka babaye naghupot og sensitibo ug importanteng papel sa organisasyon.
Kon mokuha man gani og trabahante ang kompaniya, posibleng limitahan ang gidaghanon ug hikawan ang mga babaye sa mga promosyon nga haum unta alang kanila, apan mahadlok ang kompaniya tungod sa posibilidad nga mahanaw kini sa taas nga panahon kon momabdos ug manganak.
Mas maayo tingali nga pangitaan og paagi sa kagamhanan nga hatagan og insintibo ang mga kompaniya matag kawaning babaye nga manganak. Sama ba ron sa paghatag og tax incentive, pinansyal nga reward ug uban pa.
Hayan pinaagi sa mga reward nga ihatag sa kagamhanan nga magdasig niini sa pagkuha og mga babayeng trabahante, mahanaw o makuhaan ang kabalaka sa epekto sa pagmabdos ug pagpanganak sa babayeng trabahante.