ADUNA nay mapuy-an nga evacuation center ang mga molupyo sa Sugbo nga maapektuhan og kalamidad.
Ang P36 milyones nga Cebu Regional Evacuation Center (CREC) ang gitugyan sa Department of Public Works and Highways (DPWH) 7 ngadto sa mga opisyal sa kagamhanan sa lalawigan sa Sugbo pagka Huwebes, Pebrero 28, atol sa labing unang full council nga tigom sa Provincial Disaster Risk Reduction and Management Council (PDRRMC).
Si Engr. Faustino “Jun” Dela Cruz, pangu sa maintenance division sa DPWH 7 ug maoy ni-turnover sa center, nibutyag nga moabot og 50 ka pamilya o 150 ngadto sa 200 ka mga indibidwal ang masud sa maong evacuation center.
Nangu sa seremonyas sa pag-turnover sila si Gobernador Hilario Davide III ug Bise Gobernador Agnes Magpale.
Ang CREC naa mahimutang sa luna nga gipanag-iya sa kagamhanan sa probinsya sa Sugbo ug sa Central Command sa Armed Forces of the Philippines (AFP) sa Sitio Panabang, Barangay Apas, siyudad sa Sugbo, unahan sa compound sa usa ka TV network.
Matod ni Dela Cruz, unique ang desinyo sa evacuation center nga nagbarog sud sa 3,000 metro kwadrado nga luna kay naa kini walo ka mga pacilidad nga motubag sa panginahanglanon sa mga mobakwit.
Naglakip kini sa infirmary, breastfeeding station, cooking area, dining area, buwag nga mga pansayan alang sa mga lalake ug babaye, butangan sa generator sets, water storage, ug storage facility alang sa relief goods.
“I think this area is very strategic, kay naa siya sa tunga, and then a little bit higher ground,” sumala ni Dela Cruz dihang nahinabi sa mga tigbalita human sa turnover.
Sigon niini luwas ang dapit sa landslide kay nainspeksyon ug na-certify na kini sa Mines and Geosciences Bureau (MGB) 7.
Siya nidugang napatuman ang proyekto nga nahuman og tukod niadtong Nobiyembre sa miaging tuig gumikan sa pagtinabangay sa lainlaing mga ahensiya sa gobiyerno sama sa Office of the Civil Defense nga maoy nigahin og pundo. (SCG)