NIMANDO si Cebu City Police Office Director Sr. Supt. Royina Garma sa mga chief of police nga panid-an ang armadong mga grupo nga giingong nakit-an sa walo ka bukirang mga barangay sa syudad sa Sugbo.
Matod ni Garma nga sa ilang nakuha nga impormasyon, ang mao nga mga gurpo gipaluyohan sa mga pulitiko nga nagpaluyo hinungdan nga gawasnon nga makita sa kabukiran.
Niadtong miaging semana, nilusad ang kapulisan sa Siyudad og dungan nga anti criminality operation.
Niresulta kini sa pagkamatay sa duha ka mga barangay tanod sa Lusaran nga gitumbok nga mga sakop sa usa ka armed group.
“May mga armed group and we believed na last year daw, last election I think, these are the people used by some politicians. Mayron pa ngang natira eh,” matod ni Garma.
Wa pa hinuoy giila ang CCPO nga lugar nga matawag nga critical sa umaabot nga eleksyon.
Apan kon padayon nga maghasi ang mga armado sa bukid, irekomendar nila nga ibutang sa orange category ang walo ka mga barangay.
Wa una nganli ni Garma kon unsa kini nga mga barangay sanglit ila pang i-monitor uban sa Cebu City Mobile Force Company.
Si Chief Supt. Debold Sinas, pangulo sa Police Regional Office 7, magpaabot lang kon unsay rekomendasyon ni Garma.
17 KA DAPIT
Moabot sa 17 ka mga dapit sa probinsiya sa Sugbo ang girekomendar sa kapulisan nga ipaubos sa areas of concern sa umaabot nga piniliay sa Mayo.
Kini atol sa gipahigayon nga panagtigum sa Provincial Joint Security Control Center (RJSCC) niadtong Martes, Pebrero 26.
Wa hinuon nganli sa Cebu Provincial Commission on Elections (Comelec) ang maong mga lugar apan matod ni acting election supervisor, Jerome Brillantes, gipa-assess niya kini og balik sa kapulisan kay di siya kumbinsido nga angay kining ilakip sa areas of concern.
Gitug-an ni Brillantes nga ang 17 ka mga dapit gilangkuban sa pipila ka mga lungsod ug siyudad sa probinsiya sa Sugbo.
Ang pagbutang sa usa ka lugar sa areas of concern gitumbok ni Brillantes nga tugbang sa pag-isa niini ngadto sa orange alert level.
Gihimong basehanan sa rekomendasyon ang pagka-contested sa mga posisyon ingon man ang presensiya sa mga armadong tawo o grupo.
Wala hinuon nganli sa Comelec ang maong mga lugar ug gipa-review ni Brillantes sa kapulisan ang estado sa maong mga dapit.
“..but yet ako tong gipabalik sa ila kay I want it to be reviewd thoroughly,” niingon si Brillantes.
Sa laing bahin, si Brillantes usab mismo nipaabot na sa iyang rekomendasyon sa RJSCC labot sa pagdugang og police o AFP personnel sa San Fernando aron maoy moproteher sa mga nangahadlok nga mga magtutudlo.
Nagduha-duha pag-serbisyo sa umaabot nga piniliay ang mga public school teacher sa maong lungsod tungod sa sunod-sunod nga pagpatay sa mga politiko sa ilang dapit.
Apan nahilot ra kini human sila gipasaligan sa Comelec nga hatagan og igong seguridad atol sa eleksiyon.
Matod ni Brillantes, ang mga dapit nga anaa sa orange alert level, magkinahanglan ug di momenus tulo ka mga pulis o sundawo sa matag polling place o tunghaan diin dunay botasyon nga pagahimuon.
Ang San Fernando anaa sa red alert level busa mas daghang pulis ang gikinahanglan.