MIAPELAR si Bise Gobernador Agnes Magpale sa mga ginikanan nga i-monitor ug bantayan ang games nga giduwa sa ilang mga anak sa computer o sa cellphones.
Gihimo kini sa bise gobernador human nikatap sa internet ang online challenges nga giingong mag-enganyo sa kabataan nga magkutlo sa ilang kinabuhi.
Si Magpale, chairperson sa Provincial Council for the Welfare of Children (PCWC), nipadayag ang pagtumaw sa online challenges sama sa Momo Challenge ug Blue Whale Challenge maghatag og kabalaka sa mga ginikanan labi na maghatag kini og kadaut sa kinabuhi sa kabataan.
Matod niya, duna’y nadawat nga report ang iyang buhatan “verbally” nga dunay mga kaso sa paghikog sa usa ka lungsod sa habagatang Sugbo nga naglambigit og mga bata nga gi-post una daan sa Facebook sa wala pa mahitabo ang pagkutlo sa kinabuhi.
Wa niya nganli kon unsa nga lungsod ug wa usab siya mohatag og dugang detalye bahin niini.
“That’s why I said, this cause for worry kay again this will affect the emotions of the kids,” pahayag ni Magpale.
Siya masaligon nga duna nay gibuhat nga aksyon ang kapulisan ug National Bureau of Investigation kalabot sa mga online challenge nga magdasig sa kabataan nga magkutlo sa ilang kinabuhi.
“If we can block off pero lisod man sad gud no kon ipa-block off nato, duna na ba tay pruweba og ingana gyud na ka tinuod. Let’s start with the parents, guidance of the parents,” dugang ni Magpale.
Sa Momo Challenge, usa ka monyeka nga kahahadlokan ang hitsura ug nagsiga ang mata ang nag-enganyo sa kabataan nga ibutang ang ilang contact sa messaging app kay padad-an kini og bayolente nga mga imahe nga mag-aghat nga pasakitan ang iyang kaugalingon.
Base sa report, isal-at ang mensahe ni Momo sa mga video nga pangbata nga gitan-aw sa kabataan ug suguon kini nga motuman sa delikado nga mga sugo pinaagi sa mga mensahe.
Kini nga challenge unang nikatap sa mga nasod nga naggamit og Spanish nga pinulungan apan nauso usab kini sa mga nasod nga nagsulti og Iningles human ang YouTuber ReignBOt nihimo sa video niini niadtong Hulyo sa miaging tuig.
Ang publiko mas naalarma dihang ang Police Service of Northern Ireland (PSNI) ni-post og pasidaan batok niini sa Facebook sa miaging semana.
Samtang ang Blue Whale Challenge kay dunay 50 ka mga sugo nga ipabuhat sa kabataan apil niini ang pagpasakit sa ilang kaugalingon ug sa ubang mga tawo hangtod nga mandoan kini nga maghikog.
Kini nga mga online challenge nikatap na sa social media ug Youtube diin giingong tumong sa admin sa maong mga duwa ang pag-hack sa personal nga kasayuran sa mga bata human sila madani nga moapil sa hagit.
Didto sa Manila, usa ka 11 anyos nga bata nga lalake ang giingong naghikog ug ang Momo Challenge ang gibasol sa inahan niini sa pagkamatay sa iyang anak. (SCG)