Anak naapektuhan sa Momo challenge

USA ka inahan nikumpirma nga lakip iyang anak sa naapektuhan sa Momo challenge nga iyang nadiskubre bag-o lang.

Nagviral ang post ni Clyde Insly, dihang gipangpost niini sa iyang Facebook account ang mga drawing sa iyang anak nga adunay hitsura sa ngil-ad og nawong nga babaye ug adunay daghan nakasulat nga “Momo gotta kill you!”

Si Insly niingon nga 7 anyos pa lamang ang iyang anak karong panahona.

Sa post sab niini iyang gisulti nga wala niya gidahom nga nakita na diay kini sa iyang anak nga si Yani, samtang nagsige kini og tan-aw sa youtube.

Dihang iyang gipangutana dili kini motug-an sa sinugdanan apan nakasulti nga gibaharan daw siya ni Momo nga patyon siya.

Iyang namatikdan niaging mga semana nga gasige ug ingon iyang anak nga “I love you mama, ayoko mamatay ka” nga iya ra sab tubagon nga dili kini mahitabo samtang baskog pa kini.

Apan dihang iyang gisusi ang mga notebook niini maoy iyang nadiskubre ang mga hulagway sa Momo.

Matud ni Clyde nga naapektuhan iyang anak ug iyang gihimo karon gipang block ug gipangdelete ang mga application niini diha sa cellphone.

Gihinay hinay sab niini og tambag iyang anak nga dili mahadlok ug mosulti kung adunay problema.

“I never thought nga sige na diay nig kakita ni Momo sa youtube. I talked to her, dili sya mutug-an kay kung musulti daw siya, patyon daw ko ni momo or magpakita si momo sa iyaha,” matud ni Clyde ug miapela sa mga ginikanan nga magbinantayon ug susihon ang mga gamit sa ilang mga anak kay basin hinay hinay nang naapektuhan niini.

Padayon karon ang Department of Information and Communications Technology (Dict) sa pagpanawagan kalabot niining ‘Momo challenge’ sa social media site kon diin naghatag peligro sa mga kabataan nga gapanan-aw niini.

Nihangyo si Director Allan Cabanlong, ang Executive Director sa Dict's Cybercrime Investigation and Coordination Center (CICC), sa katawhan labina sa mga ginikanan nga magbinantayon hilabina nga naghatag kini og peligro sa mga kabataan nga mahilig og dula ug atubang diha sa social media.

“Ang Momo challenge isang game ito na inuutusan na mag complete ng 50 task at isa doon sa mga task niya sa last task ay utusan siyang magpapakamatay siya gaya ng paglaslas ng katawan. Yunn ang nangyayari sa momo challenge application nato at nagiging biktima nito ay ang mga bata,” matud ni Cabanlong.

Sa Momo Challenge, usa ka monyeka nga kahadlokan ang hitsura ug nagsiga ang mata ang nag-enganyo sa kabataan nga ibutang ang ilang contact sa messaging app kay padad-an kini og bayolente nga mga imahe nga mag-aghat nga pasakitan ang iyang kaugalingon.

Base sa report, isal-at ang mensahe ni Momo sa mga video nga pangbata nga gitan-aw sa kabataan ug suguon kini nga motuman sa delikado nga mga sugo pinaagi sa mga mensahe.

Kini nga challenge unang nikatap sa mga nasod nga naggamit og Spanish nga pinulungan apan nauso usab kini sa mga nasod nga nagsulti og Iningles human ang YouTuber ReignBOt nihimo sa video niini niadtong Hulyo sa miaging tuig.

Ang publiko mas naalarma dihang ang Police Service of Northern Ireland nipost og pasidaan batok niini sa Facebook sa miaging semana.

Samtang ang Blue Whale Challenge dunay 50 ka mga sugo nga ipabuhat sa kabataan apil niini ang pagpasakit sa ilang kaugalingon ug sa ubang mga tawo hangtod nga mandoan kini nga maghikog.

Kini nga mga online challenge nikatap na sa social media ug Youtube diin giingong tumong sa admin sa maong mga duwa ang pag-hack sa personal nga kasayuran sa mga bata human sila madani nga moapil sa hagit.

Didto sa Manila, usa ka 11 anyos nga bata nga lalake ang giingong naghikog ug ang Momo Challenge ang gibasol sa inahan niini sa pagkamatay sa iyang anak.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph