NEGOSYANTE nga gi-ambush sa dakbayan sa Mandaue niaging Pebrero 20, wala na igkita sa kapulisan.
Sulod sa usa ka semana na nga wala nakig-alayon ang gi-ambush nga negosyante sa dakbayan sa Mandaue nga si John Pearlnel Denoro.
Matud pa, Biyernes, Pebrero 22, nilarga uban ang tibuok pamilya si Denoro ug wala na nibalik sa ilang panimalay sa Barangay Alang-alang.
Kahinumduman nga gibanhigan kini samtang padulong pauli sa ilahang balay.
Matud ni Police Colonel Julian Entoma, Mandaue City Police Office (MCPO) director nga nakasabot sila sa biktima nga tinguha lang niini nga maprotektahan ang iyang pamilya ug kaugalingon.
Awhag nila, makig-alayon kini kanila pag-usab, ilabi na nga posibleng dako nga grupo sa mga ilegalista ang likud sa pagpamanhig sa negosyante.
Matud ni Entoma, gitug-an ni Denoro nga ang gidudahan niini nga nagtinguha sa iyang kinabuhi, usa ka negosyante nga na-link ngadto sa Ozamis Group, kon ang Kuratong Baleleng Gang.
Tinguha sa MCPO nga ipatan-aw kang Denoro ang mga motor nga gipangsakyan sa upat ka mga lalaki nga gipangpusil-patay sa lungsod sa Consolacion niadtong Biyernes sa hapon, Pebrero 22.
Naglakip niini ang usa ka kanhi pulis, nga bag-o lang nakapyansa, ug tulo ka mga naila nga nalambigit sa drugas ug mga giingon nga gun-for-hire.
Gitug-an ni Entoma nga ang maong mga gipusil-patay sa Consolacion nasuta nga nalambigit usab sa Kuratong.
Lakip sa ipatan-aw kang Denoro ang mga motorsiklo nga nasakmit gikan sa tulisan nga giilang sakop gihapon sa Kuratong nga si Gerry Erana.
Dugang ni Entoma, gitug-an ni Denoro nga dili lang usa ka motorsiklo ang nisuway sa pagpamanhig kaniya, kon dili mga lalaki nga nagsakay og duha ka motorsiklo.
Matud sa direktor, posibleng aduna pa'y mas lawom nga nahibaw-an si Denoro sa dula nga ilegal sa mga nakontra niini ug dili lang kalabot sa negosyo.
Ang kasayuran niini posible unta nga dako matabang aron pagpuhag pa sa mga grupo sa Kuratong nga ania sa Sugbo.
“Kay sa negosyo lang, sa nakuha namo nga raw nga information sa mga kaila niini nga negoyante sa Toledo City, aduna siya'y utang nga P2 milyon sa kato iyang gidudahan, 'nya dugay na kaayo to, sa 2015," gitug-an ni Entoma sa Superbalita Cebu.
"Sa giingon niya nga na-link to sa Ozamis, so posible nga basin mo-connect sa mga series nga nahitabo dire, shooting incidents, mga tulis, nga naglambigit ni sa Ozamis group (Kuratong). Murag maayo man unta nga mura nabungkag sila (Kuratong) diri, pero nahimo man gud ta sa Mandaue nga crime-prone areas. Mao na atong gitan-aw og gipugngan nga basin naa pay lain nga maangin aning murag balsanay nila,” sigon ni Entoma.