MAASIN CITY, Southern Leyte -- Personal nga gi-surrender ni Maasin City Mayor Nacional Mercado ang iyang armas nga aduna'y expired license ngadto sa kapulisan, Biyernes, Marso 1.
Si Lieutenant Colonel Mark Nalda, uban sa iyang Deputy Police Chief Inspector Ariel Nuñez, ang nidawat sa armas.
Ang maong armas usa ka escort 12-gauge shotgun.
Matod ni Nalda, ibalik lang nila ngadto sa tag-iya ang armas kon maka-renew na kini sa ilang lisensya.
Dugang ni Nalda, gipanghingusgan nila ang kampanya batok sa mga ilegal nga armas hilabi niining nagsing-abot nga piniliay sa Mayo.
Kini ang gitawag og Oplan Paglalansag.
Samtang gipatuman usab nila ang Oplan Katok diin tuktokon sa kapulisan ang mga panimalay sa nanag-iya og armas nga expired ang lisensya ug awhagon nga ipa-renew kini o ibutang usa sa kustodiya sa kapulisan.
Matod ni Nalda, mamahimong subject sa police operation ang mga tawo nga di motahan sa ilang armas nga wala'y dokumento.
Dugang ni Nalda nga dako kaayo og tabang ang pag-surrender sa mga unlicensed firearms aron makab-ot ang patas ug hapsay nga piniliay.
Gawas niini mapugngan usab nga mag-atubang og problemang legal ang tag-iya gumikan sa wa pag-surrender.
Base sa datos sa Police Regional Office (PRO) 8, gikan Pebrero 20 ngadto sa 26, naa na sa 53 ka armas ug 375 ka bala ang naa sa ilang kustodiya.
Naglakip kini sa 12 ka kalibre .9mm, upat ka 12 guage shotgun, tulo ka kalibre .380 ug kalibre .40, 24 ka kalibre .45, duha ka kalibre .25 ug 6.35, usa ka kalibre .22, usa ka kalibre .30 ug usa ka kalibre 5.56 rifle.
Duna usab 35 ka magazine sa nagkalain-laing kalibre ug usa ka Ingram suppressor.
Sa Leyte Police Provincial Office niabot sa 28 ka tawo ang mitahan, Southern Leyte Police Provincial Office dunay siyam, Biliran Police Provincial Office dunay walo, Tacloban City Police Office dunay upat ug Northern Samar Police Provincial Office dunay usa.
Sa 50 ka indibidwal nga mitahan sa ilang armas, duha niini ang law enforcers.