CEBU. Mga armas nakuha sa balay ni Central Visayas drug lord Franz Sabalones sa Minglanilla, Cebu. (Tampo nga hulagway)
CEBU. Mga armas nakuha sa balay ni Central Visayas drug lord Franz Sabalones sa Minglanilla, Cebu. (Tampo nga hulagway)

Sabalones gi-raid

PASADO alas 7 sa buntag, Marso 1, gironda sa Provincial Intelligence Branch (PIB) nga gipangulohan ni Police Major Christopher Rey Natnat ug Police Captain Alejandro Batobalonos sa Provincial Drug Enforcement Unit ang balay nga gipuy-an sa live in partner sa giilang self-confessed drug lord sa Sugbo, Farnz Sabalones.

Ang balay nahimutang sa Block 3, Modena Subdivision, sitio Estaca, Barangay Tunghaan, Minglanilla.

Dala ang search warrant nga giluwatan ni Judge Leopoldo Canete sa Regional Trial Court (RTC) Branch 60 sa lungsod sa Barili may kalabutan sa pagtiner niini og armas nga expired na ang mga lisensya, girumbo sa mga pulis ang balay.

Apan sa pag-abot sa mga pulis, wa si Sabalones ug ang iyang live in partner lang nga si Wenefreda Misa,32, lakip na ang duha niya ka mga anak, ang naabtan sa sulod sa balay.

Uban ang mga barangay official, gisulod nila ang duha ka andanang balay nga gituohan nga kang Sabalones.

Sa sulod sa kwarto nakuha ang usa ka 5.56 M4 rifle nga adunay magazine; 20 ka bala; usa ka kalibre .45 nga pistola nga adunay magazine; usa ka KG9 submachine pistol nga adunay 17 ka mga bala; usa ka hand grenade; ug usa ka cellular phone.

Matod ni Batobalonos nga taod-taod na nila nga gi-monitor si Franz Sabalones human masuta nga nibalik sa iyang ilegal nga negusyo.

Nakadawat silag impormasyon nga sa maong balay mopauli si Sabalones.

“Sa sige natog surveillance na confirm nato nga mag arian gyud siya diri kay naa man diri ang duha niya ka anak diri,” matod ni Batobalonos.

Pasado alas 12 sa kaadlawon, nakit-an si Sabalones nga matod pa naabot sa subdivision sakay sa iyang itom nga Vios.

Wa ra usab kini magdugay, nibiya kini dayon.

Apan si Wenefreda nihimakak nga magduawan pa si Franz sa ilang balay kay unom na ka tuig nga wa sila magkita.

Di, matod pa, tinuod ang pangangkon sa kapulisan nga didto kagahapon si Franz.

“Six years na nga wala gyud na siya moari. Ako, akoang bata ug katabang lang ang naa diri. Wa ko gadahom nga ingon ani ni,” matod ni Wenefreda.

Wa siya dakpa sa kapulisan.

Matod niya nga nagtrabaho siya sa online nga maoy iyang gibuhi sa iyang duha ka anak.

Wa siya motug-an kon unsa nga matang sa trabaho.

Apan ang mga operatiba nakakuhag ledger nga magmatuod nga magdawatan og kapin sa P100,000 nga allowance si Wenefreda alang sa tuition sa bata ug uban pang galastohan sa balay.

Ang ledger nakuha sa lamesa sa kwarto niini, lakip na ang mga resibo sa usa ka money courier diin ang labing dako nga nakuha niya mao ang P100,000 ug ang labing gamay P80,000.

“Iyang gi deny nga naa pa silay contact ni Franz nya pagkakuha namo sa iyang ledger, niangkon na siya. Pero una niyang giingon nga ang mother ni Franz ang maghatagan niya,” dugang ni Batobalonos.

Related Stories

No stories found.
SunStar Publishing Inc.
www.sunstar.com.ph