NADISKUBREHAN na lamang nga baho na ug padung na sa pagkadugta diin gilapa pa kini sa iro ang usa ka patay nga lawas sa tawo nga nakit-an Huwebes sa hapon, Pebrero 28, didto sa Purok 6, Mahayahay, Brgy. Langub Davao City.
Base sa inisyal nga imbestigasyon sa kapulisan sa Talomo Police Station ang biktima gihulagway nga usa ka babaye, anaa sa 25 anyos hangtud 30 anyos ang edad, dunay gitas-on nga 5'2, nakasout og maong ug nagka t-shirt nga dunay bulak bulak.
Nakit-an kini sa usa ka tiguwang sa dihang nagtugway siya sa iyang binuhing baka sa bakante nga lote sa lugar.
Una pa nakita ang patay nga lawas, nanimaho ang palibot sa lugar mao nga gisubay kini sa tiguwang ug misugat sa iyang panan-aw ang misiwil nga kamot gikan sa nagtapun-og nga basura ug gihinay-hinay og lapa sa iro.
Gisulayan niya'g bugaw ang iro, apan gitangag pa sa iro ang pipila ka parte sa lawas sa babaye.
Gilayon nga gipahibalo sa tiguwang ngadto sa otoridad ang maong hitabo.
Hinuon, gilayong gikuha ang patay nga lawas sa babaye sa taga punerarya aron buhatan og otopsiya ug masayran unsay hinungdan sa iyang kamatayon.