KAY lisod pa nga adunay madeklarar nga barangay drug-cleared sa dakbayan sa Mandaue, tinguha sa kapulisan nga bisan purok drug-cleared lang.
Gitug-an ni Police Colonel Julian Entoma, Mandaue City Police Office director, bisan sa hugot na nga pakig-alayon sa mga barangay opisyal sa kapulisan, Philippine Drug Enforcement Agency (PDEA) ug sa Dept. Of Interior and Local Government (DILG), anaa gihapon ang mga manggamitay ug mamaligyaay og drugas sa matag barangay.
Hinungdan nga sa labing uwahi nga coordinating meeting sa MCPO, PDEA, DILG ug sa committe on health sa Konseho, usa sa ila nga gitan-aw nga paagi nga masugdan na nga adunay lugar nga madeklarar nga drug-cleared, anha kini sa purok.
“Usa sa problema na naa pa gyud ni mamaligyaay tungod sa demand, ug usa sa amo gitan-aw nga makatabang, ang amo plano sa DILG ug PDEA, pinaagi sa tabang sa barangay, diha sa ilang pagpakig-alayon sa mga residente pinaagi sa tabang mismo sa mga molupyo. Adunay i-identify nga purok. Mo-lower down ta sa Purok, kay mga pila ra man ni ilang mga balay nga composition, tutukan nato ang usa ka purok, hangtud nga sa pikas purok, hangtud malukop nato tibuok barangay,” pagpasabot ni Entoma sa Superbalita Cebu.
“Ako moangkon ko nga diri sa Mandaue City, murag lisud gyud pa nga modiretso ta sa barangay, alang sa declaration sa drug-cleared, mao na akong paningkamutan nga sa akong term sa pagka-director, bisan mga purok man lang, naa tay malimpyo, naa tay matawag nga purok drug-cleared,” dugang ni Entoma.
TOP 5
Sa padayon nga presensya sa mga mamaligyaay og drugas ug manggamitay, laing mga barangay sa dakbayan sa Mandaue giila sa MCPO nga top 5 sa pagka-moderately affected sa illegal nga drugas.
Nag-una ang barangay Looc, ikaduha ang Umapad, Labogon, Subangdaku ug Cubacub.
Nag-una na karon ang barangay Looc, usa sa gitan-aw nga rason tungod kay anaa sa lugar ang Mandaue City Jail.
Diin sa mga nadawat nga intelligence report ug sa mga pamahayag sa uban sa mga dinakpan nga ang drugas nga gipangbaligya, nagpaluyo o gikan sa mga drug lord nga anaa na-priso sud sa City Jail.
“Ato makita nga una, daku-daku ang Looc nga barangay, then ang iyahang porma sa mga balay-balay daghan diha makita nga maka-take advantage gyud sa higayon (tungod sa pagka-tapot-tapot sa mga balay, daghang kasuokan o kadaganan), isa diha, naa gyud customer, naa gyud ang demand. Plus usa siguro sa hinungdan diha nga naa ng atong City Jail, diin nagpadayon ang ilahang kontak sa gawas sa mga drug lord nga anaa sa sulod,” pagtug-an ni Entoma.
Daan na gitug-an sa MCPO nga tanan nga 27 ka barangay sa dakbayan moderately affected sa drugas.
Kay gawas sa mga drug surrenderers, adunay mga nasikop ang kapulisan nga mga manggamitay ug mamaligyaay.
Ang pag-identify sa mga moderately affected barangay tungod gihapon sa tinguha nga aduna na untay madeklarar nga drug-cleared sa siyudad.
Matod usab sa director nga kon basehan lang ang gidaghanon sa dakup sa mga tawo may labot sa drugas, nag-una niini ang barangay Centro.
Kasagaran sa mga nadakpan sa Centro, possession ug di pushing ug kasagaran sa mga pusher nga madakpan, gikan silingang siyudad o lungsod.
Gitug-an ni Entoma nga hugot nga nakig-alayon kanila ang mga barangay opisyal, ilabi na ang sa Looc, Umapad, Labogon, Subangdaku ug Cubacub. FMD