MAGPINUG-ANAY og singot sa utok ang labing maayong chess players sa Sugbo ug uban pang mga dapit sa Jazz Chillin’ Open Rapid Chess Tournament karong Marso 10 sa Jazz Chillin’ Restaurant & Music Lounge sa Brgy. Zapatera, dakbayan sa Sugbo.
Ang torneyo, nga sanctioned sa National Chess Federation of the Philippines (NCFP), gilaumang salmutan sa upat ka national masters (NM) ug usa ka international master (IM) nga makonsiderar nga sayong mga inilog alang sa titulo.
Gipangtumbok mao sila si IM Kim Steven Yap ug ang mga NM nga sila si Rommel Ganzon, Merben Roque, Rogelio Enriquez Jr. ug Edsel Montoya.
Lakip sa dekalidad nga mga magduduwa nga seguradong mangapil mao sila si Richard Natividad, Carlos Moreno III, Ronald Bancod ug Diego Capurino.
Ang mga nagpasiugda naglaom nga moabot sa 80 ka mga magduduwa ang magtigi ning 7-Round Swiss nga torneyo.
Ang kampiyon sa torneyo makadawat og P6,000, makadala og P4,000 ang 2nd placer, P2,000 sa 3rd placer ug P1,000 sa 4th placer.
Ang mahiluna sa ikalima ngadto sa ika-10 nga dapit adunay P500 matag usa samtang ang makapuwesto sa ika-11 ngadto sa ika-15 nga dapit adunay P200 matag usa.
Ang top kiddie players sa Under-15 ug Under-12 makaangkon og P1,000 matag usa.
Alang sa dugang mga impormasyon, mahimong motawag kang Engr. John Velarde sa 0917-6666717. ESL