NIAGI pa sa talasaong upat ka mga overtime ang Chicago Bulls una nila nasungag ang host Atlanta Hawks, 168-161, sa makasaysayong duwa sa National Basketball Association (NBA) kagahapon.
Mao kini ang ika-13 pa lang nga higayon nga nahitabo ang upat ka mga overtime sa kasaysaysan sa NBA.
Ang kinatibuk-ang 329 ka mga puntos nga natigom ning duwaa maoy ikatulo sa labing dako sa kasaysayan.
Nagsunod kini sa 370 ka mga puntos nga narehistro sa duwa tali sa Detriot Pistons ug Denver Nuggets niadtong Disyembre, 1983, ug 337 ka mga puntos sa duwa sa Milwaukee Bucks ug San Antonio Spurs niadtong Marso, 1982.
Pito ka mga magduduwa sa Bulls ang nakamugna og dobleng numero puntos nga gipangulohan ni Zach Lavine, kinsa nagpakatap og 47 puntos.
Si Lauri Markkanen nidugang og 31 puntos ug 17 rebounds alang sa Bulls samtang nitampo sab og 31 puntos ug 10 rebounds si Otto Porter Jr.
Nakapasulod og tulo ka freethrows si Markkaken aron hatagan ang Bulls og 162-159 nga labaw sa nahabiling 1:59 minutos sa ikaupat nga overtime.
Human niini, wala na buhii sa Bulls ang ilang labaw hangtod na sa pagkahuman sa makutas nga kombati.
Kuyaw na sab untang nakaduwa ang impresibong rookie sa Hawks nga si Trae Young ug nagpakatap kini’g bag-ong career-high nga 49 puntos apan nausik lang ang tanan tungod sa ilang kapildihan.
Kini maoy ikatulong sunodsunod nga duwa nga natupngan o nalabwan ni Young ang iyang career-high. Si Young nakamugna og tag 36 puntos sa miaging duha ka mga duwa sa Hawks.
Sa kasaysayan sa NBA, maoy ikaduha pa lang nga rookie nga nakapundo og 120 ka mga puntos sa tulo ka sunodsunod nga mga duwa sunod ni Allen Iverson sa Philadelphia 76ers niadtong Abril, 1997.
Ang mga numero nga natali ni Young ning duwaa nakapahiluna kaniya sa talagsaong tapok sa mga magduduwa. Ikaupat pa lang siya nga rookie sa kasaysayan nga nakamugna og 45 puntos, 10 assists ug lima ka rebounds sa usa ka duwa.
Aduna unta’y kahigayunan ang Hawks nga buakon ang 155-155 nga panagtabla aron humanon ang duwa sa ikatulong overtime apan nakamugna og krusyal nga turnovers sila si Young ug DeAndre Bembry.
Ang tulo ka napasulod nga freethrows ni Porter maoy nakapugos sa premirong overtime sa duwa, 124-124
Ang layup ni Young sa nahabiling usa ka segundo sa premirong overtime maoy nakapugos sa ikaduhang overtime, 140-140.
Ang three-pointer ni Ryan Arcidiacono sa Bulls maoy nakaahat sa ikatulong overtime, 147-147.
Samtang ang layup ni Lavine maoy nakapugos sa ikaupat nga overtime, 155-155. AP